Transfer: 14 jylda – 25 mln eýro

Keıingi 14 jylda Qazaqstan­nyń Premer-lıgasyndaǵy klýbtar fýtbolshylardy satyp alý nemese jalǵa alý maqsatynda 25,039 mln eýro (qazirgi kýrs boıynsha 12,271 mlrd tenge) jumsady. Eń kóp shyǵyndalǵan – «Astana». 2010 jyldan beri olar 13,731 mln-dy sarp etti. Máselen, Danııanyń «Ko­pen­gageninen» Pıeros Sotırıýdy jáne Slovenııanyń «Domjalesinen» Ne­manıa Maksımovıchty óz qatary­na qosý úshin elordalyq klýbtyń basshylary 2 mln eýrony sheteldikter­ge shytyrlatyp turyp sanap berdi. Nıderlandtyń «AZ Alkamary» Dorın Rotarıý úshin 1,5 mln surady. Al «Astanaǵa» birese kelip, birese ketken ganalyq forvard Patrık Tvýmasıdiń burynǵy klýbtarynyń esepshottaryna elordalyqtardyń tarapynan 2,2 mln aýdaryldy. Olardan bólek, Laslo Klıaınhaısler (100 myń jalǵa + 750 myń transfer), Marın Tomasov (500 myń), Iаn Vorogovskıı (400 myń), Nurbol Jumasqalıev (400 myń), Maks Ebong (250 myń), Foksı Ketevoama (70+120), Bahtıer Zaınýtdınov (46 myń) jáne taǵy basqa barlyǵy 23 aıaqdop sheberleri úshin «Astananyń» bıýdjetinen 14 mln eýro bólindi. Bıyl qysta olar gvıneıalyq vınger Ýsman Kamarany 350 myńǵa satyp aldy.

Qazaqstan fýtbolynyń flagmany «Qaıratty» kúsheıtýdi maqsat tutqan olıgarhtar aqshany ońdy-soldy shashty. Olardyń shyǵyny – 7,87 mln eýro. 2017 jyly Georgıı Jýkov pen 2020 jyly Iаsek Gýralskı úshin Ekaterınbýrgtiń «Ýraly» men Razgradtyń «Lýdogoresi» 1 mln-nan surady. Olardyń suranysyn almaty­lyqtar tolyǵymen qanaǵattandyrdy. Sondaı-aq Erkebulan Tuńǵyshbaev (870 myń), Shterlı Mamba (700 myń), Makı Banıak (500 myń), Gafýrjan Súımaǵambetov (450 myń), Erkebulan Seıdahmet (300 myń), Gúljigit Alyqulov (180 myń) jáne Vıktor Vasın de (100 myń) «Qaıratqa» arzanǵa túsken joq.

Kóp shyǵyndalǵan klýbtardyń úshtigin «Aqtóbe» túıindep tur. Olar ózbekstandyq Marat Bıkmaev (500 myń), bosnııalyq Darko Maletıch (200 myń), Qaraǵandynyń týmasy Aslan Darabaev (200 myń), lıtvalyq Artýras Jýlpa (175 myń) jáne basqa da oıynshylardy óz qataryna qosýǵa 1,175 mln eýro jumsady.

«Ordabasy» men «Tobyl» da qymbat fýtbolshylardy satyp alýǵa qumar. Shymkenttikterdiń shyǵyny – 547 myń eýro. Bosnııalyq jartylaı qorǵaýshy Mırzad Mehanovıch úshin olar 2018 jyly 400 myńdy esh oılanbaı tóledi. Qostanaılyqtardyń shyǵyny – 535 eýro. 2010 jyldan beri «Tobyl» 10 aıaqdop sheberine «quda tústi. Solardyń arasyndaǵy eń qundylary – Senın Sebaı (Kot-d’Ivýar, 100 myń), Albert Gabaraev (Reseı, 80 myń) jáne Essen Ededema (Nıgerııa, 70 myń).

«Shahter» 460 myń eýroǵa úsh transfer jasady. Osydan 10 jyl buryn olar aýstralııalyq Mıhret Topchagıchti 400 myńǵa satyp aldy. 51 matchta qarsylastar qaqpasyn 16 márte dál kózdegen jasyl qurlyq­tyń ókili qaraǵandylyq komandanyń jaqsy nátıje kórsetýine biraz úles qosty. «Ertis» 381 myń eýroǵa shy­ǵyndaldy. Eń qymbat transfer – Borıvoe Fılıpovıch. 2010 jyly serbııalyq shabýylshy 250 myńǵa baǵalandy. Biraq bul aqsha jelge ushty dese de bolady. О́ıtkeni pavlodarlyq klýbtyń sapynda jarty jyl ǵana oınaǵan Fılıpovıch 13 básekeniń birde-bireýinde mergendik tanyta almady.

Sondaı-aq TOP-10 klýbtyń qa­ta­rynda «Jetisý», «Atyraý» jáne «Oq­jetpes» bar. Biraq olar­­dyń jum­saǵan qarjylary joǵa­ry­da atalǵan komandalarmen salys­tyr­ǵanda túkke de turmaıdy. Bul rette tal­dyqorǵandyqtar 155 myńdy Martın Toshev úshin ǵana berdi. 29 jastaǵy bolgarııalyq shabýylshy «Jetisýdyń» jeıdesin kıgen bir jylda 29 márte jasyl alańǵa shyǵyp, 13 dopty qaqpaǵa toǵytty. Atyraýlyqtar nebári 83 myń (ser­bııa­lyq Iovan Djokıch – 47 myń, bela­rýstik Fılıpp Rýdık – 36 myń) jáne kókshetaýlyqtar 25 myń eýroǵa ǵana shyǵyndaldy. Bul somanyń barly­ǵyn «Oqjetpes» jalǵyz ǵana lıtva­lyq qorǵaýshy Georgas Freıdgeımasqa jumsady.