Foto: vıdeoskrın
Qaraly oqıǵa 2023 jyldyń tamyzynda bolǵan. Erli-zaıyptylar arasynda TikTok áleýmettik jelisine baılanysty janjal týyndaǵan. Kúıeýi áıeliniń áleýmettik jelige vıdeo júktegenine narazylyq bildirip, «pyshaqty ózińe suq» dep buıyrǵan. Aradaǵy urys tóbeleske ulasyp, kisi ólimimen aıaqtaldy. Bul oqıǵaǵa erli-zaıyptylardyń balalary kýá bolǵan.
Qylmysyn jasyrýǵa árekettengen áıel marqumnyń denesin bólshektep tastaǵan eken. Máıitti bóshkege salǵan qylmysker kórshisine ótinish jasap, Keles ózenine barǵan. Áıeldiń tún ishindegi bul áreketinen seskengen kórshi úshinshi kúni bóshkeni ashyp kórgen.
Osylaısha, Qundyz Moldabekovanyń qylmysy áshkere bolyp, eldiń úreıin týǵyzdy. Buǵan deıin áıel máıittiń bólshektengen úsh bóligin ózenge aǵyzyp úlgergen edi. Oǵan qosa joldasynyń kóligin 2 mıllıon 300 myńǵa satyp jibergen.
Qylmyskerge 99-baptyń 2-bóligi (Adam óltirý) jáne 190 baptyń 1-bóligi (Alaıaqtyq) boıynsha aıyp taǵylyp, sot úkimimen 15 jylǵa bas bostandyǵynan aıyryldy.
Sottalýshynyń anasy qaıtys bolǵan er adam buǵan deıin de áıeline qol kóterip, qorlyq kórsetkenin alǵa tartty.
«Qyzymnyń da nemerelerimniń de kórmegeni joq. Balalary: «Mamamdy sheshindirip, jalańash aıazǵa shyǵaratyn» dep jıi shaǵymdanatyn. О́zi temeki shegip, shoǵyn qyzymnyń keýdesine basqan, temirmen de uryp-soqqan. Qyzym shydady, biraq bári jınala-jınala, aqyry, qylmys jasaldy», dedi sottalýshynyń anasy Tillaıym Moldabekova.
