«Qazaqstan tarıhyna qatysty qundy qoljazbalardy, sırek kitaptar men kóne qujattardy anyqtap, olardyń kóshirmelerin alý jumystary elimizdiń Ulttyq arhıv qoryn tolyqtyrýǵa baǵyttalǵan. Ǵylymı issapardy joǵary deńgeıde uıymdastyrýǵa Mádenıet jáne aqparat mınıstrligi men Qazaqstannyń Ulybrıtanııadaǵy elshiligi qoldaý kórsetti. Ǵylymı issapardy uıymdastyrý jumystary eki aıǵa sozyldy. Daıyndyq barysynda sheteldik áriptestermen birneshe kezdesý ótkizildi. Biz tarıhı qujattardyń kóshirmelerin aldyq», dedi Qoljazbalar jáne sırek kitaptar ulttyq ortalyǵynyń dırektory Jandos Boldyqov.
Manchester qalasynan tabylǵan qundy qoljazbalardyń biri – shamamen, X-XII ǵasyrlarda alǵash túrki tiline aýdarylǵan qasıetti Quran kitaby. Túrki tilindegi aýdarmasy Júsip Balasaǵunıdiń «Qutty bilik» tiline óte jaqyn. Kitaptyń túrki-ıslam mádenıeti úshin mańyzy zor.
Sondaı-aq mańyzdy qoljazbalardyń biri – arab tilinde bıblıografııalyq baǵytta jazylǵan ortaǵasyrlyq eńbek. «Kıtáb maqalaat ár-Rafııa fıı ýsýl ılm at-tabııa» («Tabıǵat ǵylymynyń negizderi týraly joǵary maqalalar kitaby») kitabynda ábý Nasyr ál-Farabıdiń ómirbaıany men qoljazbalary jaıynda málimetter bar. Eýropalyq zertteýshi Karl Brokkelman óz eńbeginde qoljazbanyń ál-Farabıge tıesili ekenin atap kórsetken.
Ásirese, mamandardy Oksfordtyń Bodlıan kitaphanasynan HI ǵasyrdaǵy parsy tarıhshysy Ábý Saıd Abd-ál-Haıı-Gardızıdiń «Zeın ál-ahbar» eńbegi erekshe qyzyqtyrǵan. Qoljazba 1049-1053 jyldar aralyǵynda jazylǵan. Eńbekte 1032 jylǵa deıingi parsy (ıslamǵa deıingi) patshalardyń, Muhammed pen halıfalardyń, sondaı-aq Horasannyń 1041 jylǵa deıingi tarıhy qamtylǵan. Úndistan, Azııanyń túrki taıpalary, orystar, grekter arasyndaǵy ǵylym, din, merekeler týraly taraýlar bar. Atalǵan qoljazbanyń úzindilerin V.V.Bartold «Mońǵol shapqynshylyǵy dáýirindegi Túrkistan» jáne «1893-1894 jyldardaǵy Orta Azııaǵa sapar týraly esep» eńbekterinde qoldanypty.
Ulttyq ortalyqtyń qyzmetkerleri men sheteldik ǵalymdar qoljazbalar men basqa da eńbekterge birlesken zertteýler júrgizýdi josparlap otyr.
