Foto: kapital.kz
- Shaıbaly hokkeıden áıelder arasyndaǵy Qazaqstan chempıonaty aıaqtalyp, bas júlde «Aısulýǵa» buıyrdy. Olar 20 kezdesýden keıin 39 upaı jıdy. Almatylyq arýlar atalǵan dodada osymen 18 ret altynnan alqa taǵyp otyr. Kúmis medaldy Astananyń «Tomırısi» ıelense, О́skemenniń «Torpedosy» qolaǵa qol sozdy.
- Batýtta sekirýden Germanııanyń Kotbýs qalasynda ótken Álem kýboginiń kezeńdik saıysynda Danıl Musabaev 47-orynda qalyp qoıǵanyna qaramastan Parıj Olımpıadasynda óner kórsetetin órenderdiń tizimine ilikti. Bul rette qandasymyzdyń 2023 jyly Portýgalııa (9-oryn) men AQSh-ta (20-oryn) ótken reıtıngtik jarystarda kórsetken nátıjeleri esepke alyndy.
- Ústel tennısinen Beırýtte ótken «WTT Feeder Beirut» týrnırinde Qazaqstan quramasy úsh júlde oljalady. Elimizdiń eń úzdik oıynshysy Kırıll Gerasımenko qatarynan tórt básekede basymdyq tanytyp, aqtyq synǵa deıin alqynbaı jetti. Fınalda Gerasımenko juptyq saıystaǵy álem chempıony, Azııa birinshiliginiń on dúrkin júldegeri, taıpeılik Chýan Chı-Iýanǵa ese jiberip, kúmis medaldy ıelendi. Al Aıdos Kenjeǵulov pen Alan Qurmanǵalıev jáne Záýresh Aqasheva men Sarvınoz Mirqadyrova juptyq saıysta qola júldeni enshiledi.
- Bokstan Dýbaıda «Ramazan oıyndary» óz máresine jetti. Bul jarysty elimizdiń bylǵary qolǵap sheberleri qos qola medalmen qorytyndylady. Onyń ıegerleri – Nazerke Malelova (48 kg) men Qýanysh Erjenov (60 kg).
- Halyqaralyq fýtbol qaýymdastyǵy (FIFA) ulttyq quramalardyń reıtıngin jarııalady. Osyǵan deıin 100-orynda turǵan Qazaqstannyń ulttyq quramasy Grekııaǵa qarsy oıyndaǵy sátsizdikterden keıin bir satyǵa tómendep, qazirgi kezde 101-oryndy qanaǵat tutyp tur. Al úzdikter tiziminde Argentına kósh bastasa, ekinshi jáne úshinshi oryndarda – Fransııa men Belgııa quramalary.
- 29-31 naýryz aralyǵynda Túrkııanyń Antalıasynda dzıýdodan Grand Slam týrnıri ótedi. Erler básekesinde Nurqanat Serikbaev (60 kg) Ǵusman Qyrǵyzbaev (66 kg), Danııar Shamshaev (73 kg), Abylaıhan Jubanazar (81 kg), Ermahan Ánýarbekov (90 kg), Nurlyhan Sharhan men Ádilet Saparǵalıev (100 kg), Ǵalymjan Qyryqbaı men Erasyl Qajybaev (+100 kg) tatamıge shyǵady. Áıelder arasynda Ábıba Ábýjaqynova, Dıana Býrkeeva (48 kg), Tolǵanaı Ábeýova (52 kg), Baqyt Qusaqbaeva (57 kg), Samalaı Erǵalıeva men Gúlnur Bahanova (63 kg), Ekaterına Tokareva (70 kg), Margarıta Grısenko men Arýna Jangeldına (78 kg), Aqerke Ramazanova men Mádına Paragýlgova (+78 kg) óner kórsetedi.
