Máselen, kókshetaýlyq volonterler mektep jertólelerin sýdan aryltý, sorý sharalaryna jumyldyryldy. Osyndaı jumystar oblystyń tasqyn sýdan zardap shekken aýdandardyń barlyǵynda atqarylyp jatyr. Sondaı-aq eriktiler aımaqtardy qardan tazartý jumystaryna da tartyldy. Ásirese jalǵyzbasty qarttardyń úılerin sý tasqynynan aldyn alý úshin aýla mańyn muz ben qardan tazartyp jatyr.
Al Abaı oblysynda kópirdiń qulaýyna baılanysty Bozaı eldi mekenine kirip shyǵý múmkin bolmaǵandyqtan, arnaıy tehnıka arqyly azyq-túlik pen basqa da kerekti jabdyqtar jetkizilip jatyr. Sonymen qatar eriktiler turǵyn úılerge sýdyń kirip ketpeýi úshin qum toltyrylǵan qapshyqtardan bógetterdi ornalastyrýǵa kómek kórsetip jatyr. Oqıǵa ornynda 30-ǵa jýyqerikti qol ushyn sozyp júr. 
«Jastar Rýhy» Jastar qanatynyń tóraǵasy Aqerke Iskanderova apat bastalǵaly beri aımaqtarda volonterler túrli baǵytta kómek kórsetip jatqanyn aıtty.
«Jastar qanatynyń aımaqtyq fılıaldary sý basqan oryndarda qalpyna keltirý jumystaryna jumyldyrylsa, ekinshi óńirde qala mańyndaǵy ózenderdiń tasyp ketpeýin aldyn alyp, bógetter jasap jatyr. Odan bólek rýhtastar gýmanıtarlyq kómekti shalǵaı aýyldarǵa jetkizýdi qolǵa aldy. Kúni-túni jumys jasap, halyqty evakýasııalaýǵa atsalysyp jatqan volonterlerdiń de eńbegin erekshe atap ótý kerek», dedi ol.
Jastar qanatynyń aqtóbelik volonterleri búgin túnde 1584 turǵyndy evakýasııalady. Al Batys Qazaqstan oblysynda shalǵaı ornalasqan eldi mekenderge 3 tonna kóleminde gýmanıtarlyq kómek jetkizilip, turǵyndarǵa tabystaldy.
Tasqyn sý júrgen 5 aımaqqa – Abaı, Aqtóbe, Qostanaı, Batys Qazaqstan, Aqmola oblystarynyń eriktilerine arnaıy kıim jabdyqtary joldandy. Uıymdastyrýshylardyń aıtýy boıynsha, eriktilerdiń densaýlyǵy basty orynda tur.
Aqmola oblysynyń volonteri Serik Tanatbaevtyń aıtýynsha, zardap shekken otandastarymyzǵa qoldan kelgen bar kómek kórsetilip jatyr.
«Apat bolǵan ýaqyttan beri osyndamyz. Tótenshe jaǵdaı qyzmetkerleriniń nusqaýymen sý basqan úılerdi sýdan tazartý, tasqyn sýdyń aldyn alý jumystaryn júrgizip jatyrmyz. «Bir jaǵadan bas, bir jeńnen qol shyǵaryp» sý tasqynynyń alǵashqy saǵatynan-aq jergilikti turǵyndarǵa kómek berip jatyrmyz. Jastar qanatynyń volonterleri el basyna kún týǵan jaǵdaıda árdaıym halyqqa kómek berýge daıyn», dedi ol.
Sondaı-aq táýlik boıy kezekshilikte júrgen Aqmola jáne Abaı oblysynyń tótenshe jaǵdaı departamenti qyzmetkerlerine Jastar qanaty «Biz Birgemiz» qoǵamdyq qorynyń qoldaýymen aýyzashar ýaqytynda ystyq tamaq úlestirildi. Abaı oblysy Aıagóz aýdanynda sý deńgeıiniń joǵary bolýyna baılanysty tamaqtar arnaıy qaıyqtar arqyly jetkizildi.
«Biz Birgemiz» QQ jetekshisi Qaırat Perızat osynaý qasıetti aıda tyńbaı eńbek etip jatqan batyrlamyzǵa erekshe alǵys bildirdi.
«Apat aıtyp kelmeıdi. Sý tasqyny halyqty ábigerge túsirip, tótenshe jaǵdaılar qyzmetkerleri qansha kúnnen beri tynymsyz eńbek etip jatyr. Mine, biz de belsendilermen birge sol azamattarymyzǵa aýyzashar uıymdastyrdyq. Elimizdiń óńirlerindegi jaǵdaı tez arada rettelip, zardap shekken halyq óz shańyraqtarymen qaıta qaýyshsa eken deımiz», dedi Q. Perızat.
Búgingi kúni qyzyl sý jaılaǵan aımaqtarǵa «Jastar Rýhynyń» 350-den asa eriktileri qol ushyn sozyp jatyr.
