Jer-jerdegi tasyǵan nópir dúıim eldi sarsańǵa túsirdi. Apat áli de seıiler emes. Kólikter qarǵyn sýda qalyptap, mal-múlik aǵyp ketip jatyr. Osynaý qıyn-qystaý kezeńde jaýapty mamandarǵa ilese «Jastar rýhy» jastar qanaty kómek kórsetýdi jalǵastyryp keledi. Ásirese Abaı, Aqmola, Aqtóbe, Almaty, Batys Qazaqstan, Qaraǵandy, Qostanaı, Ulytaý oblysynda el janashyrlary táýlik boıyna halyqty evakýasııalaýǵa jumyldy. Aqtóbe oblysynda tótenshe jaǵdaı tusynda qolushyn sozǵandardyń arasynda Álisher Tynyshtyq ta bar.
– Aımaqtardaǵy qazirgi ahýal barshamyzǵa belgili. Oblysymyzdaǵy jaǵdaıdy bile tura, qol qýsyryp otyra almadyq. Bir top erikti Shubarqudyq aýylyna jolǵa shyqtyq. Qardyń qarqyndy erýine baılanysty bolǵan sý tasqynynan zardap shekken turǵyndarǵa barynsha kómek kórsetýge daıynbyz, – deıdi erikti.
Evakýasııalanǵan turǵyndardy mektepterge ornalastyryp, turǵyndarǵa kerekti gýmanıtarlyq kómek – azyq-túlik, gıgıenalyq kerek-jaraq, kórpe tósekter úlestirilip jatyr. «Jastar rýhy» JQ tóraǵasy Aqerke Eskendirovanyń sózinshe, búginde qyzyl sý jaılaǵan aımaqtarǵa jasaqtalǵan 500-den asa erikti qaýip seıilgenshe sapta bolady.
– Bir jaǵadan bas, bir jeńnen qol shyǵaryp, sý tasqynynyń alǵashqy saǵatynan-aq jergilikti turǵyndarǵa kómek berýdemiz. Aqtóbedegi arnaıy qurylǵan volonterlik toppen birge gýmanıtarlyq kómek ortalyǵynda jınalǵan zattar turǵyndarǵa jetkizildi. Árıne, olardyń ishinde TJ kezinde kerekti deıtin alǵashqy kómek zattary, kıim-keshek, azyq-túlik pen gıgıenalyq zattar bar. Apat oryn alǵan aımaqtardaǵy volonterler tek gýmanıtarlyq kómekke ǵana emes, sý tasqyny saldarynan búlingen ǵımarattardy qaıta qalpyna keltirýge, táýlik boıy qyzmette júrgen TJ qyzmetkerlerine aýyzashar ýaqytynda ystyq tamaq jetkizýge, jalǵyzbasty qarttardyń aýlasyn qardan tazartýǵa atsalysyp jatyr. Jastar qanaty oqıǵa ornynda kómektesip júrgen volonterlerdi de nazardan tys qaldyrmady. Tasqyn sý oryn alǵan aımaqtardyń eriktilerine arnaıy kıim jabdyqtaryn joldady, – dedi ol.
Al Abaı oblysynda kópirdiń qulaýyna baılanysty Bozaı eldi mekenine kirip-shyǵý múmkin bolmaǵandyqtan, el janashyrlary arnaıy tehnıka arqyly azyq-túlik pen basqa da kerekti jabdyqtardy jetkizýge kómektesti. Sondaı-aq turǵyn úılerge sýdyń kirip ketpeýi úshin qum toltyrylǵan qapshyqtardan bógetterdi ornalastyryp jatyr. Tipti joǵalyp ketken azamattardy izdestirý jumysyna da qolǵabys boldy.
– О́ńirlerde gýmanıtarlyq kómekti jınaqtaýda, halyqqa tabystaýda «Biz Birgemiz» qoǵamdyq qory da birikti. Sondaı-aq táýlik boıy kezekshilikte júrgen Abaı oblysynyń Tótenshe jaǵdaı departamenti qyzmetkerlerine Jastar qanaty «Biz Birgemiz» qoǵamdyq qorynyń qoldaýymen aýyzashar ýaqytynda ystyq tamaq úlestirildi. Qasıetti aıda tynbaı eńbek etip jatqan baýyrlarymyzǵa erekshe alǵys bildiremiz. Apat aıtyp kelmeıdi. Sondyqtan respýblıkadaǵy jaǵdaı tez arada rettelip, zardap shekken halyq óz shańyraqtarymen qaıta qaýyshsa eken, – dedi «Biz Birgemiz» QQ jetekshisi Qaırat Perızat.
