Táýelsiz Qazaqstan Parlamenti Senatynyń tuńǵysh tóraǵasy bolǵan О́mirbek Baıgeldi aǵamyz bar ǵumyrynda týǵan eli men halqyna adal qyzmet etken ultjandy azamat edi. Arǵy-bergi tarıhymyzdy tereń biletin, halyqtyń ótkeni men búgini týraly júrgen ortasynda aǵalyq oı-pikiri men janashyrlyq kóńilin bildirip otyratyn. Ultymyzdyń tarıhyn tereńnen zerttep, shet elderden babalarymyz jaıynda qundy derekter taýyp, tól tarıhymyzdy túgendeýge de atsalysqan tulǵa bolatyn.
О́mirbek Baıgeldiuly Qazaqstan Respýblıkasy Parlamentiniń qalyptasýynda óziniń mol bilimi men búkil qajyr-qaıratymen eńbek etti. Bar bilimi men tájirıbesin elimizdi kórkeıtýge, nyǵaıtýǵa jumsady. Qaı qyzmette júrse de, adamgershilik qasıetterimen áriptesteriniń arasynda árdaıym zor abyroı men bedelge ıe boldy. Eńbegi elenip joǵary memlekettik nagradalarmen marapattaldy.
Táýelsizdikke qol jetkizgen jyldary eldigimizdi eńseli etýdiń bastaýynda turdy. El ekonomıkasy men áleýetin órkendetý jolynda óziniń bilimin, mol tájirıbesin jáne iskerligi men biliktiligin kórsetti.
El múddesin, halyqtyń bolashaǵyn sátke de esinen shyǵarǵan emes. Memlekettik qyzmettiń joǵary satysynda júrgende óziniń úlken mádenıettigi men ımandy izettiligimen, halyq dástúrin jaqsy biletin taǵylymy tereń, oı-óresi bıik jan ekenin talaı márte tanytty.Ǵıbratty ǵumyr ıesi naǵyz parasatty tulǵa, muraty bıik azamattyń biri boldy.
О́mirbek Baıgeldiuly aǵamyzdyń jarqyn beınesi árdaıym jadymyzda saqtalady!
Baqtyqoja Izmuhambetov,
Parlament Májilisiniń depýtaty, «Ardagerler uıymy»
RQB Ortalyq keńesiniń tóraǵasy, Qazaqstannyń Eńbek Eri
