Elimizdi mekendegen barlyq etnostyń ónerin dáripteýge den qoıǵan teatr ultaralyq kelisimdi negizge ala otyryp, halyqty tolǵandyratyn ózekti máselege mán berip, óner tilimen sýrettep keledi. Tarıhyn ótken ǵasyrdyń 30-jyldarynan tarqatatyn uıǵyr mýzykalyq komedııa teatry tól rýhanııatynyń kórkem shejireshisi ǵana emes, el óneriniń bir bólshegi retinde mádenıetterdi jaqyndastyrýǵa óz úlesin qosyp keledi. Bıyl atalyp ótetin toqsan jyldyq torqaly toıyna da tııanaqty daıyndalyp, jaqynda teatr tarıhynan syr shertetin óz mýzeıin jasaqtady.
Teatr shejiresin jınaqtaǵan mýzeıdiń ashylý saltanatynda alǵashqy aqjarma tilegin bildirgen teatrdyń basshysy, Qazaqstannyń eńbek sińirgen qaıratkeri Dılmýrat Baharov, belgili sahna maıtalmany, Qazaqstannyń eńbek sińirgen ártisi Rıhangýl Mahpırova men M.Áýezov atyndaǵy Ulttyq drama teatrynyń dırektory Erkin Jýasbek óner tarıhyndaǵy aıtýly oqıǵanyń teatr ujymdary arasyndaǵy baılanystyń nyǵaıýyna sebepker bolatynyn atap ótti. Qyzyl lentany qııý rásimindegi quttyqtaýdyń kelesi legin Qazaqstannyń eńbek sińirgen qaıratkeri Alymjan Aısaev pen T.Júrgenov atyndaǵy ulttyq О́ner akademııasynyń professory Aman Bekenuly jalǵady. Teatr tarıhyndaǵy mańyzy zor sharaǵa arnaıy shaqyrylǵan qonaqtar mýzeıdi tamashalap, olarǵa teatrdyń ádebıet bóliminiń meńgerýshisi Gýlbahar Nasırova sahna óneriniń qalyptasýy men damýyna eńbek sińirgen uıǵyr halqynyń talantty ul-qyzdary týraly áńgimelep berdi. 1934 jyly qurylǵan teatr, ǵımarattyń syrtqy beınesi, repertýardaǵy qoıylymdar, sol kezdegi akterlerdiń sýretteri men sahnalyq kostıýmderi, býtaforııalyq buıymdar kópshilik nazaryna usynyldy. Sondaı-aq teatr esimin ıelengen KSRO Halyq ártisi Qudys Qojamııarovtyń ómiri men shyǵarmashylyǵyna arnalǵan burysh ashylyp, áıgili kompozıtordyń paıdalanǵan jeke buıymdary men jazbalary qoıyldy. Budan ári meımandar Kishi zal men jas sýretshilerdiń shyǵarmalary qoıylǵan «Dúnıe-art» galereıasyn tamashalady. Mereke sońy teatr ártisteri ázirlegen dýmandy keshpen túıindeldi.
ALMATY
