Foto: ult.kz
Sý tasqynynan zardap shekken aımaqtarda qurylǵan jedel kómek kórsetý shtabtarynyń quramynda aýmaqtyq kásipodaq birlestikteriniń tóraǵalary bar. Olar jergilikti jáne salalyq kásipodaqtardyń basyn biriktirip, barynsha kómek kórsetip jatyr.
Qazirgi kezde Atyraý men Oralda jaǵdaı qıyndady. Keshe ǵana Batys Qazaqstan oblystyq kásipodaq ortalyǵynyń tóraǵasy Aıgúl Esekenovamen habarlasyp, óńirdegi ahýaldy bildik. Sý deńgeıi 9 metrden asyp ketýi múmkin degen boljam bar. Sol sebepti 7 myńǵa jýyq adamdy qaýipsiz jerge kóshirip, jaǵalaý bıiktetildi. Bastapqyda apattan zardap shekkenderdi «Aqjaıyq» shıpajaıyna ornalastyrý josparlanǵan edi. Sáýir aıynyń basynda shıpajaıdyń irgesine qyrdan erigen qar sýy kelgen. Jumysshylar tórt kún boıy sýdy motormen soryp, bul qaterden qutyldy. Alaıda endigi qaýip Jaıyq ózeni deńgeıiniń kóterilýine baılanysty týyndap otyr. Qazirgi kezde aýyldyń tómengi jaǵynan or qazyp, sýdy toqtatpaqpyz.
Sondaı-aq Atyraý oblysyndaǵy 10 myńǵa jýyq kásipodaq músheleri Jaıyq, Qıǵash, Sharon ózenderiniń jaǵalaýyn nyǵaıtýǵa atsalysty. Aýmaqtyq kásipodaqtar birlestiginiń tóraǵasy Álibek Semǵalıev apatty óńirde 5 táýlik boıy tynbaı jumys istep jatyr. Qazirgi kezde kásipodaq músheleri Sokolov kanalynyń boıymen 14 shaqyrymdyq bóget salý jumysyna belsendi kómektesip jatyr.
Sonymen qatar respýblıkalyq mańyzy bar joldardy sý shaıýyna baılanysty jumys ornyna jete almaǵan kásipodaq múshelerin temirjolmen tasymaldaýǵa jaǵdaı týǵyzdyq.
Qostanaıdaǵy áriptesterimizben de kúndelikti baılanystamyz. Er azamattar birneshe táýlik boıy qaptarǵa qum toltyryp, bóget salsa, áıelder úı-úıdi aralap, turǵyndardy, maldy evakýasııalaý týraly túsinikteme jumystaryn júrgizedi. Muǵalimder tamaq pisirip, psıhologter kúızeliske ushyraǵandarǵa qoldaý kórsetip jatyr. Búgingi tańda 135 evakýasııalyq bekette kásipodaq belsendileri apattan zardap shekkenderdi jaıǵastyryp, azyq-túlikpen qamtamasyz etip júr. Qajet bolǵan jaǵdaıda medısınalyq kómek te kórsetedi.
Aqtóbe oblysynda jaǵdaı birte-birte túzelip keledi. Osy ýaqytqa deıin belgili bolǵan málimetterge sáıkes sý tasqynynan zardap shekken kásipodaq músheleriniń tizimi jasaldy. Jalpy sany 730-ǵa jýyq adamǵa kómek kerek ekeni anyqtaldy. Eń kóbi – bilim berý salasynyń ókilderi. 400-ge jýyq muǵalim kómekke zárý. Shyǵyn kólemi anyqtalǵanda, árbir áriptesimiz eleýsiz qalmaıdy.
Osy tusta Aqtóbe qalasyndaǵy Áýe qorǵanys kúshteri áskerı ınstıtýtynyń jeke quramyna alǵysymdy bildirgim keledi. 200-ge jýyq adam Qarǵaly ózeniniń jaǵalaýyn bekitý jumysyna jumyldyryldy. Ushqyshtar turǵyndardy qaýipsiz jerge kóshirdi. Salalyq kásipodaq músheleri evakýasııalyq beketterge qajetti zattar jetkizip, gýmanıtarlyq kómek kórsetip jatyr.
Kásipodaqtar federasııasynyń bastamasymen aýmaqtyq kásipodaq birlestikteri, salalyq uıymdar birigip, bir kúndik aılyq jalaqymyzdy sý tasqynynan zardap shekkenderge ashylǵan esepshotqa aýdaramyz dep uıǵardyq. Sonymen qatar federasııaǵa qarasty shıpajaılarǵa zardap shekken otandastarymyzdy ornalastyrý týraly tapsyrma berildi. «Uıymdasqan utady» degendeı, qıyn-qystaý kezeńde shıraq qımyldap, bilek sybana kirissek, bul synaqqa da tótep beremiz.
Satybaldy DÁÝLETALIN,
Kásipodaq Federasııasynyń tóraǵasy
