Ázirge respýblıkalyq lagerlerde sý tasqynynan zardap shekken otbasylardan 185 bala joldama alyp otyr. Onyń 10-y – Bórli aýdanynan, 48-i – Qaratóbe aýdanynan, 32-si – Syrym aýdanynan, 60-y – Terekti aýdanynan, 35-i – Oral qalasynan.
– Balanyń aty bala ǵoı. Evakýasııalyq bekette ishi pysatyn edi. Kóńili sergip, jaqsy demalyp qaıtady dep oılaımyn. Olar kelgenshe myna tasqynnyń beti qaıtyp, qalypty tirligimizge oralarmyz dep senemin. Bar jaǵdaıymyzdy jasaýǵa tyrysqany úshin bılik ókilderine, otandastarymyzǵa óte rızamyn. Elimiz aman, jurtymyz tynysh bolǵaı! – dep Jansulý Tóreshova esimdi ana alǵysyn bildirdi.
Batys Qazaqstan oblystyq bilim basqarmasynyń bólim basshysy Hajarbıbi Iskanderova bergen málimetke qaraǵanda, demalys ornyna joldanǵan balalardyń alǵashqy legi jolǵa shyqqan. Birinshi lekpen attanǵan 70 bala 10-24 sáýir aralyǵynda Almaty oblysyndaǵy «Taý Janashar» saýyqtyrý lagerinde demalady. Al 13 bala 10-30 sáýir aralyǵynda Almaty qalasyndaǵy «Bóbek» saýyqtyrý ortalyǵynda bolady. Buǵan qosa 102 bala Qyzylorda oblysy Qazaly qalasyndaǵy «Qambash» saýyqtyrý ortalyǵyna joldandy. Ol jaqta oqýshylar 10 kún demalady.
– Bizdiń úıge sý kiretin bolǵan soń bárimizdi avtobýspen sport zalǵa jetkizdi. Al búgin Almatyǵa lagerge jiberip jatyr. Qasymda evakýasııalyq bekette tanysqan dostarym da bar. Men buryn Almatyny kórmep edim. Ol jaqtaǵy demalysymyz jaqsy ótedi dep oılaımyn. Bizdi Almaty qalasyna jibergen aǵa-apalarǵa, ata-anama rızamyn, – deıdi qýanyshyn jasyra almaǵan Jahansha Dosmuhameduly atyndaǵy mektep oqýshysy Orazbek Syrymbek.
Batys Qazaqstan oblysy
