Birneshe jyl buryn jergilikti jastar men atqarýshy bılik qolǵa alǵan «Áýlıeata jastary» qanatqaqty jobasy Maǵjan Jumabaev sengen jańa tolqynnyń baspanaly bolýyna múmkindik týǵyzdy. О́ńirlik turǵyn úı baǵdarlamasy aıasynda jergilikti talanttar jeńildetilgen nesıe esebinen páter alý múmkindigin ıelendi. Baıandy bastamanyń sharapatyn kórgender qarasy qalyń.
Jergilikti bılik pen «Otbasy banktiń» birlesip iske asyrǵan jobasy 2022 jyldyń ózinde aıtarlyqtaı nátıje berip, qazynadan qarastyrylǵan 500 mıllıon teńge 41 jastyń baspanaly bolýyna sep bolǵan edi. Bul jumys byltyr da jalǵasyn tapty. Nátıjesinde, «Áýlıeata jastary» arqyly páterli bolýǵa talpynǵan jastardyń sany kóbeıdi.
О́tken jyldyń aıaq tusynda «Jambyl oblysynda «Áýlıeata jastary» turǵyn úı baǵdarlamasy toqtaıdy. О́ıtkeni jergilikti atqarýshy bılik bastamany qoldaýdan bas tartyp otyr eken» degen áńgime jeldeı esken bolatyn. Ár salada jemisti eńbek etip júrgen jalyndy jastar gý-gý áńgimege sene bastaǵandaı edi.
Jyl sońynda BAQ ókilderimen kezdesken óńir basshysy Erbol Qarashókeev baıandy bastamany ári qaraı jalǵastyrýdyń barlyq tetigi qarastyrylyp jatqanyn, jolaı kezdesken keıbir kedergini joıýda naqty jumystar atqarylatynyn tilge tıek etken edi. Nátıjesi jaman emes. Jergilikti bılik sózinde turǵan sekildi.
«Bul jobany bizdiń óńir respýblıka kóleminde ekinshi bolyp júzege asyrǵanyn jastardyń bári biledi. Qanatqaqty jobanyń arqasynda óńirdiń «sen tur, men ataıyn» deýge laıyq bilikti jastarynyń bir parasy baspanaly boldy.
2022 jyly bastalǵan bastama bıyl da jalǵasyn tabady. О́ıtkeni basshylyq tarapynan qoldaý bar. Bir sózben aıtqanda, ár salada jemisti eńbek etip júrgen óńir jastary baǵdarlama arqyly bıyl da úıli bola alady. Qysqasy, jastardyń turǵyn úımen qamtylýy maqsatynda qolǵa alynǵan joba toqtamaıdy», deıdi oblys ákimdigi jastar saıasaty máseleleri basqarmasynyń basshysy Jomart Zulpyhar.
San salada jemisti eńbek etip júrgen jastardy qamtıtyn baǵdarlamaǵa alǵashqy jyly jýrnalıster qaýymy enbeı qalǵan bolatyn. О́tken jyly birneshe áriptesimiz páter kiltin qolyna alyp, qonys toıyn toılaǵany esmizde. Jaýapty basqarma basshylary «jegeni jantaq, arqalaǵany altyn» sanalatyn jýrnalısterdi nazardan tys qaldyrmaǵany da shyn qýantqan edi.
«Rasynda da, «Áýlıeata jastary» baǵdarlamasy zamandastarymyzǵa tamasha múmkindik tartý etkeni anyq. Máselen, ótken jyly atalǵan joba aıasynda turǵyn úımen qamtylǵan jastardyń sanyn arttyrýǵa basymdyq berildi. Endi naqty derekti sóıleteıik.
2022 jyly joba aıasynda 41 jas otbasy páterli bolsa, byltyr 144 maman baspana kiltin aldy. Osylaısha, baspanaly bolǵandardyń sany alǵashqy jylmen salystyrǵanda birneshe ese artty. Ol úshin jergilikti bıýdjetten 1 mıllıard, «Otbasy bank» AQ tarapynan 1 mlrd teńge kóleminde qarjy qarastyrylǵan edi.
Dál osy «Áýlıeata jastary» jobasy arqyly osy jyly 130-dan astam jasty baspanamen qamtamasyz etýdi josparlap otyrǵan jaıymyz bar. Osy maqsatta jergilikti bıýdjetten 1 mıllıard teńge qarajat bólinse, «Otbasy bank» AQ taǵy 1 mıllıard teńge qarastyrýǵa bel býyp otyr. Qysqasy, jeńildetilgen nesıe esebinen taǵy da ondaǵan zamandasymyz páterge ıe bolmaq», deıdi J.Zulpyhar máseleniń mánisin túsindirip.
Shynynda da, «Áýlıeata jastary» qanatqaqty jobasyna úmit artqan jas otbasy az emes. Olardyń barlyǵy da jeńildetilgen nesıe esebinen páter alǵysy keledi. Sol turǵydan alǵanda jobanyń bıyl da jalǵasyn taýyp jatqany – quptarlyq qadam.
