Foto: smartpress.by
Málimdemede: «Iran óz quqyǵyn qamtamasyz etý jáne shabýyldaýshyny jazalaý maqsatynda sıonıstik lańkestik armııanyń basyp alǵan jerlerdegi mańyzdy áskerı nysandaryna shabýyl jasap, onyń strategııalyq barlaý pýnktterin, zymyrandar men pılotsyz áýe kólikterin joıdy», degen joldar bar.
Tóńkeris sarbazdary armııasy AQSh nemese Izraıl atynan kez kelgen elden keletin qaýip kózine jaýap qaıtarylatynyn, Irannyń zańdy múddelerin túrli shabýyl jáne zańsyz kúsh qoldanysyna qarsy qorǵaıtynyn ashyq bildirdi.
IRNA resmı aqparat agenttigi Tóńkeris sarbazdary armııasynyń Izraılge ballıstıkalyq zymyranmen shabýyl jasaǵanyn málimdegen edi. Al ızraıldik laýazym ıeleri bolsa, Irannyń Izraılge ballıstıkalyq zymyran ushyrǵanyn bildiretin eshqandaı belgi joq ekenin aıtyp otyr. Izraıl armııasy eldiń ońtústiginde áskerı bir bazaǵa shaǵyn zaqym kelgenin jáne adam shyǵyny bolmaǵanyn habarlady. Armııa: «Irannan Izraılge 200-den astam ushqyshsyz áýe kóligi ushyryldy. Qaýipterdiń kópshiligi Izraıldiń áýe keńistiginen tys jerde, Sırııa jáne Iordanııa aýmaǵynda ustaldy», dep málimdedi.
Premer-mınıstr Benıamın Netanıahý bas bolyp, Tel-Avıvke shuǵyl jınalǵan soǵys kabıneti Irannan jasalǵan ushqyshsyz áýe kóligi shabýylynyń jaı-japsaryn talqylady. Eldiń qaýipsizdik kabıneti Irannyń shabýylyna toıtarys berý úshin soǵys kabınetine jaýapkershilik júktedi.
Iran-Izraıl qaqtyǵysy búkil álemdi alańdatyp otyr. Onsyz da basylmaı kele jatqan Izraıl-Palestına daýyna qosymsha taǵy bir soǵys oshaǵy paıda bola ma degen qaýip zor.
Buǵan deıin Iran Izraılge qaraı ushqyshsyz ushaqtaryn ushyryp, Tegeran ústindegi áýe keńistigin jaýyp tastaǵan bolatyn. Izraıl 1 sáýirde Damaskidegi Iran konsýldyǵyna jasap, saldarynan Iran Islam revolıýsııasy Saqshylar korpýsynyń birneshe qolbasshysy, onyń ishinde eki general qaza tapqan edi.
Eýropalyq odaqtyń Syrtqy ister jáne qaýipsizdik saıasaty jónindegi Joǵarǵy ókili Jozep Borrel Taıaý Shyǵystaǵy jaǵdaıǵa qatysty qysqasha málimdeme jasady. «Eýropalyq odaq Irannyń Izraılge qarsy shabýylyn qatań aıyptaıdy. Bul – buryn-sońdy bolmaǵan eskalasııa jáne aımaqtyq qaýipsizdikke eleýli qater», dep jazdy eýropalyq dıplomatııanyń basshysy.
Eýropalyq keńes basshysy Sharl Mıshel de Irannyń Izraılge shabýylyn qatań aıyptady. «Aımaqtyq shıelenistiń odan ári órshýine jol bermeý úshin barlyǵyn jasaý qajet. Budan ári qantógiske jol bermeýimiz kerek. Biz áriptesterimizben birge jaǵdaıdy jiti baqylaýdy jalǵastyramyz», dedi Sh.Mıshel.
Mundaı aıyptaýlardy álemniń Ulybrıtanııa, Fransııa syndy bedeldi elderiniń syrtqy ister vedomstvolary da bildirip jatyr. Ázirge Izraıl, Iran, Iordanııa, Lıvan jáne Iraktyń áýe keńistigi ýaqytsha jabyldy.
Iran men Izraıl qaqtyǵysyna oraı elimizde «qazaqstandyq bitimgerlerge qaýip bar ma?» degen suraq týyndaǵan ras. Osyǵan oraı Qazaqstan Respýblıkasy Qorǵanys mınıstrligi Golan jotalaryndaǵy qazaqstandyq bitimgerler týraly resmı málimdeme jasady. Qorǵanys mınıstrliginiń resmı ókili Rýslan Jangýlınniń málimdeýinshe, Golan jotalarynda BUU bitimgerlik mıssııasyn oryndap jatqan qazaqstandyq kontıngent qalypty rejimde jumysyn jalǵastyryp jatyr. «Jeke quramnyń ómiri men densaýlyǵyna eshqandaı qaýip joq», dedi Qorǵanys mınıstrliginiń resmı ókili.
