Sýretti túsirgen – Almas MANAP, «EQ»
– Adam bolatyn bala osyndaı malǵa úıir bolady, – dedi jıen aǵamyz Qaıyrtaı. – О́zi bir maljandy bolaıyn dep turǵan bala eken. Osy qońyr qoshaqandy atadym. Kógentúp bolsyn.
Jolserigimiz Qaıyrtaı aqsaqalǵa umsyna qaraǵan. Tańyrqaǵan bet-álpetinen kógentúptiń ne ekenin uqpaǵandyǵy ańǵarylyp turdy.
– Eskiniń yrymy, – degen jıen aǵa, – bosaǵadan alǵash ret attaǵan et jaqyn aǵaıynnyń baldyrǵandaryna osylaı mal ataý yrymy bar. Ádette maldy, jandy áýlettiń jasap jatatyn sybaǵaly dúnıesi. Keıbireýler yrys aýyp, qut kóship ketedi dep tartynyp jatady. Onda turǵan eshteńe joq, ilki zamanda darhan dalanyń danalyǵyn boıyna jınaǵan atamyz «elde bolsa, ernińe tıedi» degen sózdi nege aıtty deısiz? Aǵaıynda bolsa jaman ba? Bizdiń úıdiń bosaǵasyna bitken azyn-aýlaq dáýlettiń bir parasy janashyr jurt naǵashyǵa aýyp jatsa, jaman emes qoı. Dúnıe degen kózdiń qurty bolǵanymen, bir tostaǵannyń ishindegi sý sııaqty tolyqsı tolqyp, aralasyp jatpaı ma? Tek nıet túzý bolsyn.
Beksultan atasynyń qurmetine dán razy. Bala kóńil baıyptap uqpasa da, oıda joqta maldy bolǵanyna máz.
– Qońyr qozyny úıge alyp ketemin, – deıdi mańdaıynan ter shypshyp.
– Qońyr qozym-aý, ony qaıda baǵasyń? Balkonǵa ma? – deıdi anasy.
Atasynyń aqjarma tilegin, jaqsy yrymyn anasy da teris kórip turǵan joq. Alǵandy kim jek kórsin?
– Beksultannyń ózi en salyp ketsin, qoshaqan qaıda qashar deısiń, ósken soń alasyń ǵoı, – deıdi atasy.
Qýtyńdaǵan qońyr qozymen birge jatyp, birge turmaqqa bekingen Beksultannyń kóńili pás.
– Ilkidegi atamyzdan qalǵan joralǵyda atalǵan maldy bermeı qalatyn jaı naǵyz qaraýlyq bolyp sanalsa kerek, – deıdi atasy Beksultannyń mańdaıynan sıpap. – Ondaıdy da kórgenbiz. Atap turyp bermeı qalsa, sarańdyǵy, jatbaýyrlyǵy.
Ata jolyn saqtaǵan jıen aǵanyń joralǵysy kishkentaı Beksultandy ǵana emes, bárimizdi de tebirentip jiberdi. Másele tipti bir ýys qozyda ǵana emes, at minip, atan jetektep júrsek te, arydaǵy ata joly, ónegesi adamnyń ishin ýyljytyp jiberedi eken-aý.
Kókshetaý qalasy
