Sý tasqynyna kúni buryn daıyndalǵan jergilikti atqarýshy bılik pen tótenshe jaǵdaılar, polısııa departamentiniń qyzmetkerleri Jambyl aýdanyna qarasty Jasórken aýlyna edel-jedel jetken. О́ńir basshysy Erbol Qarashókeev bastaǵan atqaminerler de tez arada mańaıdaǵy aýyldan tabylǵan. Barlyq qajetti tehnıkasyn alyp jetken mamandar aýyldy sýdan tazartý jumystaryna kirisip ketken. Nátıjesinde, birneshe saǵattyń bederinde sý deńgeıi aıtarlyqtaı tómendepti. Osylaısha, aýyl turǵyndarynyń daýryqqan kóńili ornyna tústi.
– Sýdyń bastapqy bıiktigi 40 santımetrge deıin barǵan. Aýyl boıynsha 30 aýlaǵa sý kirgen. Onyń ishinde sý kirgen bir ǵana úı boldy. Zardap shekkender joq. Tótenshe jaǵdaı departamenti men polısııa departamentiniń ókilderi der kezinde aýylǵa kelgen. Aýyldyq ákimdik qyzmetkerleri de ýaqtyly jumysqa jumyldyrylǵan. Jalpy sany 300-den asa maman jumysqa kiriskenin aıta ketken jón. 22 motopompa, 60-qa jýyq birlik tehnıka jumys istedi. Shý, Talas ózenderindegi sý deńgeıi turaqty baqylaýda, – deıdi E.Qarashókeev.
Jambyl aýdanyna qarasty Jasórken aýlynda 310 aýla bar. Munda 2 209 adam qonystanǵan. Nóser saldarynan paıda bolǵan kólbeý aǵyn sý aryq-atyzdyń arnasyna syımaı, mańaıdaǵy aýylǵa bet alǵan kórinedi. Qýanyshtysy, taý sýynan zardap shekkender joq.
О́ńirdegi iri sý qoımalaryndaǵy jaǵdaı jergilikti atqarýshy bılik tarapynan baqylaýǵa alynǵan. Mamandar Kırov, Tasótkel, Qaraqońyz, Qaqpatas sekildi ózge de iri sý qoımalaryna jınalǵan sý kóleminen oblys halqyna eshqandaı qaýip tónip turmaǵanyn alǵa tartyp otyr. Keıingi derekke júginsek, aýyldaǵy aýlalar, kósheler sýdan tazartylǵan. Jaryq, gaz turaqty berilip tur. Aýylda aýyzsýdyń sapasyn tekserý qorytyndysy naqtylanǵanǵa deıin, turǵyndardy taza aýyzsýmen qamtamasyz etý uıymdastyrylyp jatyr. Ýaqytsha onlaın oqýǵa kóshirilgen M.Áýezov atyndaǵy orta mektep balalardy qabyldaýǵa daıyn.
E.Qarashókeev jaýapty tulǵalarǵa zardap shekken aýlalardyń bárine qysqa merzimde tıisti kómek kórsetýdi tapsyrdy. Sonymen qatar aýyl ishindegi aryqtardy tez arada tazalaýdy mindettedi. Jasórkendegi oqıǵaǵa baılanysty aýdan ákimi Erlan Qydyralyulyna qatań sógis, onyń salaǵa jaýap beretin orynbasaryna qyzmetine tolyq sáıkes emestigi týraly eskertý, aýyl ákimine qatań sógis túrindegi tártiptik shara belgiledi.
Mundaı jaǵdaı qaıtalanbaýy úshin taý bókterinen Belaryq kanalyna deıin 2,5 shaqyrymdyq drenaj (syıymdylyǵy 1 tekshe metr) qazyldy. Ońtústik óńirde sáýir-mamyr aılarynda jaýyn-shashyn molynan túsetini málim. Jasórkenge de tolassyz jaýǵan jańbyr saldarynan kólbeý aǵyn sý jetti. Kúni buryn daıyndalǵandyqtan bolar, jergilikti bılik der kezinde oqıǵa ornynan tabylyp, qaýiptiń betin qaıtardy.
Jambyl oblysy,
Jambyl aýdany
