Tobyl qalasynyń turǵyny Nıkolaı Steshın kóp jyl boıy Sarykól aýdanynyń aýyl sharýashylyǵy salasynda kásibı ǵalym-agronom bolyp qyzmet etken. Keıin osy aýdanǵa qarasty «Maıak» keńsharyn, odan soń qazirgi Beıimbet Maılın aýdanyn basqarady. Eńbek ardageri qazir qurmetti zeınet demalysynda.
2017 jyly Nıkolaı Vasılevıch sal aýrýyna ushyrap, oń jaq denesi túgel qozǵalmaı jatyp qalady. Aýyr syrqatqa, tereń ýaıymǵa boı aldyrǵysy kelmegen qajyrly zeınetker osy kezeńnen bastap qylqalam ustap, beıneleý ónerin aldanysh etken. Oń qoly qozǵalmaı qalǵandyqtan sol qolymen sýret salyp úırenedi. Sodan beri jeti jyl boıy úzbeı sýret salyp, qylqalamnan jan tynyshtyǵyn tapqan áýesqoı sýretshiniń birtalaı týyndysy beıneleý ónerine birtaban jaqyn qalyń kórermenge jol tartyp otyr. Avtor óziniń «Qansonar», «Ańshy», «Qaıyńdar», «Kókjaldar», «Aıýmen betpe-bet», «Qasqyr alý», «Jańǵalaq ańshy», «Aýyl», «Zırat shetindegi sáki» atty týyndylaryna týǵan jerdiń ásem tabıǵatyn, ańshylyq óneri týraly ózi basynan keshirgen, estigen, kórgen oqıǵalardy arqaý etken.
«Men ótken ómirimdi oı tarazysynan ótkizip oılanyp jatamyn da, sol sátte esime túsken qyzyq bir oqıǵany kenep betine túsirýge kirisemin. Meniń týyndylarym – júregimnen, janymnan shyqqan estelikterim. О́mir boıy aýyl sharýashylyǵy salasynda ter tóktim. Shynymdy aıtsam, aýyr dert meńdegenge deıin ónerden alystaý júrgen adammyn. Az-kem eńbegimdi joǵary baǵalap, oblys ortalyǵyndaǵy mádenıet ordasyna ornalastyryp, kópshilikke kórsetip jatqan mýzeı qyzmetkerleriniń ystyq iltıpatyna rahmet aıtamyn», deıdi eńbek ardageri.
Kórmeniń ashylý rásimine qatysqan Georgıı Sokov, Nıkolaı Torshın, Sergeı Lýgovoı, Vadım Bykov tárizdi kásibı qylqalam sheberleri avtor týyndylarynyń taqyryptyq aıasy keń, kópqyrly ekenine toqtalyp, joǵary baǵa berdi.
Qostanaı oblysy
