Tarıhı kitaphana qoryndaǵy kóne jádiger – kitap eskertkishterimen jáne «Abaı joly» kitaphanasy jobasy aıasynda jaryq kórgen jaýhar týyndylarmen kópshilik qaýymdy keńinen tanystyrýdy maqsat etedi. Kórme qonaqtaryn Abaı, Shákárim, Muhtardyń kózi tirisinde olar týraly jazylǵan sırek derekkózder erekshe áserge bólegen.
Ádebı ekspozısııanyń «Abaı, Shákárim – sırek basylymdarda» bóliminde Abaı men Shákárimniń qaıratkerlik tulǵasyn ashatyn, sırek kezdesetin ólketaný basylymdary usynylǵan. Sonymen qatar jas M.Áýezovtiń tulǵalyq qasıetin tanytatyn túpnusqalar da kórmeden oryn aldy.
Al «Sırek basylymdardaǵy Áýezov shyǵarmalary» bólimi Abaıdyń kórkem ádebıettegi beınesin somdaıtyn «Abaı joly» epopeıasynyń merzimdi basylymdar betterinde jarııalanǵan alǵashqy úzindilerimen, epopeıanyń 1945, 1948, 1949, 1950 jyldardaǵy tolyq nusqasymen tanystyrdy.
Ádebı ekspozısııanyń úshinshi bóliminde oblys ákimi N.Uranhaevtyń qoldaýymen 2023 jyly júzege asyrylǵan «Abaı joly» kitaphanasy jobasy aıasynda jaryq kórgen óńir avtorlarynyń shyǵarmalary qonaqtardyń nazaryna usynyldy.
Joba aıasynda hakim Abaıdyń, oıshyl Shákárimniń, sýretker Áýezovtiń jáne osy topyraqtan shyqqan Halyq jazýshysy Á.Nurshaıyqovtyń, balalar jazýshysy Á.Tolymbektiń, qalamgerler T.Ysmaıylovtyń, Y.Musaulynyń, B.Jaqyptyń, D.Ramazannyń, A.Kemelbaevanyń ádebı-kórkem týyndylary men abaıtanýshy ǵalym T.Jurtbaıdyń eńbekteri tanystyryldy. Sonymen qatar Aqtamberdi Saryuly men Dýlat Babataıuly, Abaıdyń aqyn urpaqtarynyń shyǵarmalarynan toptastyrylǵan «Jyr jaýHarlary» jyr jınaǵy, Abaı kitaphanasynyń 140 jyldyq tarıhyna baılanysty sırek basylymdar qorynan qurastyrylǵan «Abaı kitaphanasy – sırek basylymdarda», «Hranıtel ıstorıı» atty qos tomdyq jınaqtary, respýblıkalyq «Abaı» jýrnalynyń betterinde jaryq kórgen qundy maqalalardan jınaqtalǵan «Bilgenge marjan» jınaǵy qoıyldy.
Is-shara qonaqtaryna 140 jyldan astam tarıhy bar kóne kitaphananyń sırek basylymdar qorynan jáne «Abaı joly» kitaphanasy jobasy aıasynda jaryq kórgen basylymdardan maǵlumat beretin, kıýar-kodtalǵan shyǵarmalardy mobıldi qosymshaǵa júkteý múmkindigi bar úlestirme materıaldar taratyldy.
