2018 jyly jer telimin alatyn turǵyndardyń tizimine alǵash bolyp jazylǵan Erjan Dosmuratov bolatyn. Aýyl ákimine ótinishin jazyp, qujattaryn ótkizip te qoıǵan. Biraq is tym sozylyp ketti. Qazir ózi de syrqattanyp, tósek tartyp jatyr.
Jer telimin alýdan dámeli Erjan Dosmuratovtan ózge aýyl turǵyndary qazir tóbe basyna jınalyp, ózara qyzylkeńirdek bolýmen keledi. Árqaısysynyń kókeıinde qalaýyna qaraı ıemdenip alǵan óz jeri bar.
Aýyl ákimi ruqsat bergen degen bir aýyz sózdi negiz etip, jurttyń aldy bos jatqan jerdi qorshap alyp jatyr. Onyń naqty ólshemin eshkim de bilmeıdi. Árkim qalaýynsha qazyq qaǵyp alǵan. Al eń soraqysy myna jerge jol tóseledi, al myna aýmaqqa ınfraqurylym jelisi tartylady degen jospar da jasalmaǵan.
Ázirge bul aımaqtan 17 adam jer almaq nıette. Biraq eshbiri jer kezegine turmaǵan. О́ıtkeni mundaı tizimniń ózi joq.
Al ákimge senimi joǵalǵandar bergen aqshalaryn daýlaı bastady. Aıtýlarynsha, onyń orynbasaryna kezinde 60 myńnan bastap 100 myńǵa deıin aqsha bergen.
Ákim orynbasary eldiń aıyptaýyn joqqa shyǵara almady.
Ákimniń aıtýynsha, bas jospar jasalyp, qazir eldi mekendi geoportalǵa engizý jumysy júrip jatyr. Jer telimin bólý endi bastalmaq. Sondaı-aq qazynadan bólingen 216 mıllıon teńgege elektr baǵanalary men transformator ornatý isi de bıyl qolǵa alynady.
