Balalarǵa arnalǵan alǵashqy kitabynan bastap ómir atty «Sonarǵa» «О́shpeıtin izder» basyp qaldyrǵan Sáken Júnisovtiń shyǵarmashylyǵy – kól-kósir mura. Bir shette kórkem shyǵarmalary atalyp jatsa, bir shette pesalary qoıylyp jatady. Osyǵan saı ǵylymı keńeske jınalǵandar jan-jaqty tulǵanyń ár qyryna toqtalyp, túrli eńbegin tarqatyp aıtyp, estelikterimen bólisti. San qyrly sanatkerdiń zamanynda telearnalarǵa bergen suhbattarynan úzindiler kórsetilip, ádebı kórkem týyndylarynyń erekshelikteri de qozǵalmaı qalmady.
Jazýshynyń 90 jyldyǵyna oraılastyrylǵan bul birinshi shara emes. Buǵan deıin Astana qalasy ákimdiginiń qoldaýymen «Jastar» teatrynda Sáken Júnisovti eske alýǵa arnalǵan ádebı-sazdy kesh ótkenin jıyndy júrgizgen Qazaqstan Jazýshylar odaǵynyń hatshysy, bul uıymnyń Astana qalalyq fılıalynyń dırektory Dáýletkereı Kápuly atap ótti. «Sáken Júnisovtiń qazaq ádebıetine sińirgen eńbegi ushan-teńiz. Onyń elimizdiń mańyzdy kezeńderin beınelegen súbeli shyǵarmalary – qunyn joımaıtyn qundylyqtardyń biri, halyq ómiriniń kórkem shejiresi. Sáken – tek jazýshy ǵana emes, oǵan qosa tanymal qoǵam qaıratkeri. Astananyń irgesin qalaýǵa da ózindik úles qosqan tulǵalardyń biri», dedi «Qazaq gazetteri» seriktestiginiń bas dırektory, akademık Dıhan Qamzabekuly.
Ádebıettanýshy ǵalym, professor Serik Negımov qalamgerdiń ómir jolynan áńgime qozǵady. Qazaq memlekettik ýnıversıtetin bitirerde Sáken aǵa qazaq án mátinderi jóninde dıplomdyq jumys jazady. Dıplom jetekshisi Zeınolla Qabdolov, al opponenti Muhtar Áýezov bolsa kerek. Jumys ekeýine qatty unaǵan. Jalpy, jas talantqa uly Muhtardyń yqylasy túskenin eske aldy S.Negımov. «Japandaǵy jalǵyz úı» romany úshin qýǵyndalǵanyn jáne qosty.
Jazýshy-dramatýrg Altynshash Jaǵanova, jazýshy Mádı Aıymbetov, jýrnalıst-jazýshy Jabal Erǵalıev Sáken Júnisov týraly estelikterimen bólisti. Jazýshy-dramatýrg, Memlekettik syılyqtyń laýreaty Roza Muqanova 60-jyldar qazaq ádebıetiniń altyn dáýirine aınalǵanyn eske alyp, bul ýaqytta ádebıetke kelgen qalamgerlerdiń qarym-qatynasyna toqtaldy. Belgili aqyn, ádebıettanýshy ǵalym Erbolat Baıatuly qalamgerlerdiń sheteldegi qandastardy qoldaýyna toqtalyp, bul máselege Sáken Júnisov sergek qaraǵanyn, sol maqsatta Mońǵolııaǵa arnaıy barǵanyn aıtty. Jazýshy-dramatýrg Jarylqap Beısenbaıuly Sáken Júnisov murasyn ǵylymı aınalymǵa aınaldyrý máselesin qozǵady.
Sóz arasynda Tolymbek Ábdiraıymulynyń aıtýymen Sáken Júnisovtiń Býrabaıda qurylysy bitpeı qalǵan úıiniń máselesi de kóterildi. Jazýshy Nesip Júnisbaıuly «Aqan seri» romanynyń ómirsheńdigi men qundylyǵyn bezbendep, basqa da tulǵalar birtýar qalamgerdiń shyǵarmashylyǵy men erekshe qasıetteri týrasynda sóıledi. Jıyn sońynda jazýshynyń qaryndasy Roza Júnisova jınalǵandarǵa alǵys aıtty.
