Foto: QR jumyrtqa óndirýshiler qaýymdastyǵy
«Aýqymdy apattyń alǵashqy kúninen bastap bizdiń qaýymdastyq zardap shekken azamattarǵa qoldaý kórsetip keledi. Turǵyndardyń qajettilikteri úshin 1 mıllıonnan astam jumyrtqa men 1,1 tonnadan astam qus etin jiberdik. Gýmanıtarlyq kómek jergilikti pýnktterge jetkiziledi», dedi qaýymdastyq prezıdenti Qaırat Maıyshev.
Gýmanıtarlyq kómek Batys Qazaqstan, Soltústik Qazaqstan, Aqtóbe, Atyraý, Qostanaı jáne Mańǵystaý oblystaryna jóneltildi. Sondaı-aq birlestik músheleri óńirlerge azyq-túlik ónimderimen qatar turmystyq taýarlar, júk tehnıkalary men birinshi qajettilik taýarlaryn da jóneltedi. Máselen, Qostanaı oblysyndaǵy «Jas qanat 2006» seriktestigi elektr generatorlaryn, etik, tósek-oryn men shatyrlardy jóneltti.
«Qazger qus», «Aqkól qus», «PTF Esılskaıa» jáne «Oral qus fabrıkasy» seriktestikteri aýyr tehnıka – KamAZ, júk tıegish, traktorlar bóldi.
Al Soltústik Qazaqstan oblysynyń kásiporyndary – «Iаkorsk qus fabrıkasy» jáne «Adel Qus» tasqyn sý saldaryn joıýǵa jumyldyrylǵan áskerılerge as uıymdastyrsa, «Alekrı» seriktestigi zardap shekkenderdi kásiporynnyń jataqhanasyna ornalastyrdy.
«Sý tasqyny jaǵdaıy turaqtalǵansha, biz jumysymyzdy toqtatpaımyz, barlyq qus ósirýshi kompanııalardy sý tasqynynan zardap shekken aımaqtardyń turǵyndaryna kómektesýge shaqyramyz», dep qosty Qaırat Maıyshev.
Qyrmyzy JUMAǴALIQYZY,
EUÝ stýdenti
