Foto: A.Baıjumanov
Komıtet tóraǵasy Álı Bektaev elimizdiń Prezıdenti fermerlerdi jan-jaqty qoldaýǵa erekshe nazar aýdaryp otyratynyn jáne «Aýyl amanaty» baǵdarlamasy óziniń tıimdiligi men qajettigin kórsetip kele jatqanyn atap ótkenin jetkizdi.
«Aýyl amanaty» jobasy boıynsha aýyl turǵyndary óz bıznesin damyta alady nemese kooperatıv aıasynda jeńildikpen nesıe ala alady, materıaldyq jaǵdaıdy jaqsartý úshin óz isin asha alady. Joba boıynsha qaryz alý sharttary da óte tıimdi, óıtkeni paıyzdyq mólsheri aıtarlyqtaı tómen. Mysaly, búginde birde-bir kommersııalyq banktiń aýyl turǵyndaryna osyndaı sharttarmen nesıe berýge múmkindigi joq. Álemdik ınflıasııany eskere otyryp, 2,5% nesıe alý óte tıimdi. Sondyqtan bul óndiris ashýǵa jáne ony damytýǵa tamasha múmkindik bolyp otyr. Bul joba iske asqannan beri belgili bir ýaqyt ótti. Osy baǵdarlamanyń oryndalý barysyn talqylaıtyn kez keldi», dedi senator.
Depýtattar kezdesý barysynda óńirler arasyndaǵy qarjylyq teńsizdik problemasyna qatysty máselelerdi kóterdi. Senator Ernur Áıtkenovtyń aıtýynsha, bul máseleni aýyldarda jańa jumys oryndary men shaǵyn bıznes ashý, qus pen mal basyn kóbeıtý arqyly sheshýge bolady.
Depýtattar sonymen qatar sý tasqynynan keıingi kezeńde «Aýyl amanaty» jobasyn iske asyrý men aýyl turǵyndaryn qoldaý máselesi erekshe mańyzdy ekenin atap ótti. «Aýyl amanaty» baǵdarlamasy osy turǵyda olardyń materıaldyq jaǵdaıyn jaqsartýǵa jáne halyqtyń, onyń ishinde sý tasqynynan zardap shekkenderdiń tabysyn arttyrýǵa yqpal etýi yqtımal.
