Qazaqstan-Germanııa: Syndarly saıası únqatysý ornyqqan elder

Elbasy Nursultan Na­zar­­baev Germanııanyń Fede­ral­dyq kansleri Angela Mer­kelmen kezdesti, dep habar­lady Qazaqstan Respýb­lı­ka­sy Prezıdentiniń baspasóz qyzmeti. Kelissózder barysynda eki­jaqty ekonomıkalyq qa­rym-qatynasty jandandyrý má­se­leleri, sondaı-aq, Ýkraınanyń shy­ǵysyndaǵy ahýaldy Ýkraına, Reseı, Germanııa jáne Fransııa basshylarynyń taıaýda Astanada ótýi yqtımal kezdesýi aıasynda retteý sharalary talqylandy. Eki memlekettiń kósh­bas­shy­lary Mınsk ýaǵdalastyǵyn qatysýshy taraptardyń múltiksiz júzege asyrýy qajettigin, munyń tezirek beıbit retteýge jáne senimdi nyǵaıtýǵa septigin tıgizetinin atap aıtty. Taraptar eki el arasynda belsendi ári syndarly saıası únqatysý ornaǵanyna toqtaldy, sondaı-aq, 2012 jyly aqpanda qol qoıylǵan Qazaqstan men Germanııanyń Shıkizat, ónerkásip jáne tehnologııa salalaryndaǵy seriktestik týraly úkimetaralyq kelisimin naqty iske asyrýdyń mańyzdylyǵyn atap ótti. Sonymen qatar, ınno­va­sııalyq-ınvestısııalyq ynty­maq­tastyq aıasyn keńeıtýdiń birqatar qyrlary jáne Astanada ótetin halyqaralyq EKSPO-2017 kór­me­sine daıyndyq barysy qaras­tyryldy. Elbasy, sondaı-aq, Germa­nııanyń Federaldyq syrtqy ister mınıstri Frank-Valter Shtaınmaıermen de kezdesti. Bul kezdesý F.-V. Shtaınmaıerdiń byltyr qarashada Qazaqstanǵa jasaǵan resmı sapary aıasynda bolǵan áńgimeniń jalǵasy retinde ótti. Kelissózder barysynda eki­jaqty qarym-qatynastyń basym tustary men Ýkraınanyń shyǵysyndaǵy ahýaldy retteý sharalary talqylandy. Ýkraına men Reseı prezıdentteriniń taıaý­da GFR Kansleri A.Merkel men Fransııa Prezıdenti F.Olland­tyń qatysýymen ótýi yqtımal ekijaqty kezdesýiniń birqatar alǵysharttary jóninde baıypty pikir almasyldy. Taraptar, sondaı-aq, saýda-eko­nomıkalyq ynty­maq­tas­tyqtaǵy bolashaǵy bar joba­lar men eki eldiń máde­nı-gýmanıtarlyq saladaǵy ózara is-qımyly týraly da sóz qoz­ǵady. Germanııa Federaldyq syrt­qy ister mınıstri ekijaqty ekono­mıkalyq qatynastar oń qarqynda damyp kele jatqanyna toqtala otyryp, Qazaqstannyń Ortalyq Azııadaǵy «turaqtylyq tutqasy» bolyp sanalatynyn atap aıtty. Sýretti Prezıdenttiń baspasóz qyzmeti usyndy.