Júrekjutqan

Farhat Bazarǵalıevtyń polısııa qatarynda qyzmet ete bastaǵanyna kóp bola qoıǵan joq. Qoǵamdyq tártiptiń kúzetshisi retinde bastaǵan jumysy endi jol qozǵalysynyń saqtalýyna da jaýapty bolýymen jalǵasyn tabýda. Kúndelikti jumysyn tyndyrymdy atqaratyn polısııa serjanty bala kezden qoǵamdyq tártip saqshysy bolýdy armandapty. Qazir Atyraý qalalyq ishki ister basqarmasyndaǵy áriptesteri arasynda onyń esimi qurmetpen atalady. О́ıtkeni, Farhat – tek áriptesteriniń ǵana emes, jurtshylyqtyń da shynaıy qurmetine bólengen qaharman polıseı. Onyń esinen ótken jyldyń 18 maýsymynda bolǵan oqys oqıǵa ketpeıdi. Dál sol kúni erteńgilik «112» jedel qyzmet kezekshisine «Jaıyq ózeninde qaıyq aýdaryldy» degen telefon habarlamasy tústi. Arty ókinishke uryndyrar shuǵyl habar rasııa arqyly «Batys-1» jyljymaly jol-patrýldik ekıpajyna habarlanady. Ekıpaj quramyndaǵy polıseıler – aǵa serjant Erbolat Dosjanov, serjant Farhat Bazarǵalıev jáne kishi serjant Rýslan Tanashev sanaýly mınótterden keıin oqıǵa ornyna jedel jetti. Sóıtse, Jaıyq ózeniniń jaǵalaýynda dirdek qaqqan úsh jigit otyr. Olar ózen ortasynda aýdarylǵan motorly «Kazanka» qaıyǵynda bolǵandar eken. Jaǵaǵa deıin ózderi áreń jetken. Al ózen ortasynda jartylaı sýǵa batqan qaıyq janynda bir adamnyń basy qyltııady. Qaıyqta birge bolǵan jigitterdiń aıtqanyndaı, sýǵa bir batyp, bir shyǵyp, alasurǵan boıjetken eken. Onyń basy qylt-qylt etip áreń kórinedi. Shuǵyl kómek qolyn sozbasa, baıaý bolsa da aǵysy bar ózen sýynyń tuńǵıyǵyna batyp barady. Ne isteý kerek? Jigitterdiń arasynan Farhat Bazarǵalıev oılanbastan ózenge qaraı «atyldy». Tipti, kıimin sheshýge murshasy bolmady. Oıy – qyzdy qutqarý. Kıimmen qulashtaı júzý qıyndyq týdyrǵanymen, aıtyp kelmeıtin ajal apanyndaǵy qyzǵa jaqyndap keledi. Sýdy mólsherden tys kóp jutyp qoıǵan qorǵansyz qyzǵa qoly jetisimen jaǵaǵa qaraı súıreı jóneldi. Mundaıda jaǵa da jetkizip bolmaıdy eken. Quddy alystap ketken sekildi. Abyroı bolǵanda, olardy jaǵada «jedel járdem» dárigerleri de kútip turdy. Sol jerde es-tússiz jatqan qyzǵa alǵashqy medısınalyq kómek kórsetildi. Keıin biraz kún aýrýhanada emdelip, ortaǵa qaıta oraldy. Turymtaıdan zorlyq kórgen boztorǵaıdaı ári qorqyp, ári abdyrap qalǵan boıjetkendi qutqarǵan Farhat Bazarǵalıev áriptesterimen birge kezekshiligin atqarýǵa attanyp ketti. Oǵan dál sol sátte demalýǵa bolmaıtyn edi. О́ıtkeni, polıseıler kezekshiligi bitkenge deıin qyzmetin atqarý mindeti júktelgen. Degenmen, polısııa serjanty Farhat Bazar­ǵalıevtyń batyrǵa tán batyldyq tanytyp, sýǵa bat­qan boıjetkendi qutqarǵan qaharmandyq isi áýeli qalalyq basqarmaǵa, keıin oblystyq ishki ister depar­tamentine lezde tarady. Basshylar oǵan jeke quram aldynda alǵys jarııalady. Jergilikti basylymdar arqyly polısııa serjantynyń aty jurtshylyqqa jarııa etildi. Biraq, Farhat Bazarǵalıevtyń ózi muny «Qaharmandyq is atqarǵan joqpyn. Meniń ornymda bolǵan ár polısııa qyzmetkeri dál solaı áreket etken bolar edi» dep qana jymııady. «Qıyn sátte kómek suraǵan janǵa qolushyn sozý – azamattyq paryzym» degendi de qosyp qoıdy. Iá, polısııa serjanty Farhat Bazarǵalıev tek azamattyq paryzyn atqaryp qana qoıǵan joq, bir adamdy ajal apanynan sýyryp alyp, ómirin saqtap qaldy. Sóıtse de maqtanýdy bilmeıtin Farhattyń qarapaıymdylyǵy ata-anasynan daryǵan qasıet ekenine shúbá joq. О́ıtkeni, onyń ákesi –Jetkinshek pen anasy –Gúlsofııa da óte qarapaıym jandar. Tek zeınet jasyna jetpese de olardyń jumyssyz júrgeni Farhattyń janyna batady. Otbasyndaǵy jalǵyz tabys tabýshy Farhat Bazarǵalıevtyń beıbit kúndegi batyl isi ataýsyz qalǵan joq. Byltyrǵy qarashada Ishki ister mınıstrligi uıymdastyrǵan «Qazirgi zaman qaharmandary» atty respýblıkalyq aksııaǵa atyraýlyq polıseıler atynan qatysyp, mınıstr Q. Qasymovtyń Alǵys hatyna ıe boldy. Al Táýelsizdik kúni merekesi qarsańynda Prezıdent Jarlyǵymen «Erligi úshin» medalimen marapattaldy. Qaharman serjantqa memlekettik marapatty jeke quram aldynda oblystyq ishki ister departamenti basshysynyń mindetin atqarýshy Aıan Dúısenbaev tabys etken sátte Farhat Bazarǵalıevtyń: «Qazaqstan Respýblıkasyna qyzmet etemin!» degen daýysy sańq etti. Iá, shyndyǵynda beıbit kúnniń batyry atanǵan qaharman serjant marapatty alysymen el tynyshtyǵy úshin qyzmetin atqarýǵa attanyp bara jatty. Joldasbek ShО́PEǴUL, «Egemen Qazaqstan». ATYRAÝ.