Kórkem gımnastıka sport túrin qarqyndy damytý, komandalar sanyn kóbeıtý, gımnasshylardyń sheberligin shyńdaý maqsatyndaǵy saıystyń ashylý saltanatyna Jańaózen qalasynyń ákimi Janseıit Qaınarbaev, Astana qalasy sport damytý ortalyǵynyń prezıdenti Nurjan Zakarııauly qatysyp, sportshylarǵa sáttilik tiledi.
Chempıonatqa Mańǵystaý oblysy boıynsha Aqtaý qalasy, Beıneý aýdany, Jańaózen qalasynan qurama komandalar qatysyp, baq synady. Jarysta 8-10 jas aralyǵynda 6 top, 10-12 jas aralyǵynda 2 top, 16 jastan joǵary 1 top óner kórsetti.
– Buǵan deıin óńirlik jattyqtyrýshylardyń tájirıbesin arttyrý maqsatynda respýblıkalyq deńgeıde semınar, sheberlik-saǵaty, oqý-jattyǵý jıyny ótken edi. Mańǵystaý oblysy boıynsha estetıkalyq toptyq gımnastıkadan bas jattyqtyrýshy ózim bolǵandyqtan jarystyń uıymdastyrylýyn jiti qadaǵaladym. Atalǵan jarys sport damytý ortalyǵynyń demeýshiligimen ótkizildi. Is-sharaǵa 100 shaqty sportshy qatysty. Olardyń arasynda meniń komandam «Caspian stars» ta bar. Aıta ketsem, jańaózendik «Caspian stars» komandasy – byltyrǵy Qazaqstan chempıony, el kýboginiń jeńimpazy. Al bıyl Qazaqstan kýboginiń fınalısi atandy, – dedi Mańǵystaý oblysy boıynsha estetıkalyq toptyq gımnastıkadan bas jattyqtyrýshy Nursáýle Zakarııaqyzy.
Estetıkalyq toptyq gımnastıkanyń ereksheligi komanda toppen óner kórsetedi. Bir topta belgilengen jas ereksheligine saı 14 gımnasshyǵa deıin óner kórsetýge ruqsat etiledi.
Chempıonatqa Qazaqstannyń estetıkalyq toptyq gımnastıka federasııasynyń estetıkalyq toptyq gımnastıka jónindegi tehnıkalyq komıtetiniń tóraǵasy, 1-deńgeıdegi estetıkalyq toptyq gımnastıka boıynsha IFAGG halyqaralyq sanattaǵy tóreshi Zarına Davletıarova, atalǵan komıtettiń múshesi Irına Rýsınova Astana qalasynan arnaıy kelip, qazylar alqasy quramynda bolyp, gımnasshylarǵa baǵa berdi.
– Qazylar alqasy quramynda bizben birge mańǵystaýlyq tóreshiler de boldy. Biz úsh brıgada bolyp baǵaladyq. Birinshi brıgada tehnıkalyq qundylyqtaryna qaraı, ekinshisi ártistik ónerine, al úshinshi brıgada oryndalýyna qaraı baǵa berdi, – dedi Z.Davletıarova.
Gımnasshylar erekshe kıimderimen, áýezdi áýenmen úılesim tapqan názik qımyldarymen kórermendi tánti etti. Dúbirli doda joǵary deńgeıde ótti. Saıysta ár komanda óz ónerin kórsetti. Jeńiske jetken komandalar medalmen, alǵyshatpen jáne kýbokpen marapattaldy.
Syrbaz sport kórkem gımnastıkaǵa Mańǵystaý óńirinde qyzyǵýshylar sany artyp keledi, bolashaq chempıonnyń shyraǵy janatyn kún bolary anyq.
Mańǵystaý oblysy
