Rasynda bı áleminiń aqkerbezi atanǵan «Aqkerbez» bı ansambliniń qurylǵanyna da bir múshel tolypty. Kenen Ázirbaev atyndaǵy oblystyq fılarmonııaǵa qarasty ansambl quramyndaǵy bıshi jigitter men boıjetkender ónerimen eldiń qoshemetine bólenip júr. Mádenıet salasynyń úzdigi Aıjan Qonarbaevadan tálim alatyn bıshiler halyqaralyq sahnalarda da tájirıbe jınaǵan. Bı ansambli az ǵana ýaqyt ishinde biraz bıikti baǵyndyryp ta úlgerdi.
«Aqkerbezdiń» arýlary men jigitteri san túrli bıdi bılegende olardyń óz isine asqan kásibılikpen qaraıtynyna kóziń jetip, rıza bolasyń. Ansambl repertýaryndaǵy «Erke sylqym», «Shattyq», «Jastar bıi», «Jaılaýda», «Gákký» sekildi ózge de bılerge qarap, qazaq óneriniń jańa bıikke kóterile túskenin sezinesiń.
О́rkenıet kóshine ilesken álemniń birqatar elinde bolǵan «Aqkerbezdiń» arýlary men jigitteri talaı jurttyń ónersúıer qaýymyn tamsandyrdy. Qazir ǵylym damyǵan ýaqyt qoı. Derekke júginsek, jer-jahannyń bı ansamblderi kıimnen bólek, aıaqkıim tańdaýǵa da asa zor talǵammen qaraıdy. Sán úlgisimen qatar qandaı sahnada óner kórsetetinine baılanysty tańdaý jasalady eken. Bizdiń el de osy jolǵa túse bastaǵany anyq.
«Ujym ár jyldary álemniń birqatar elinde boldy. Máselen, Úndistan eliniń birqatar qalasynda konsert ótkizdi. Odan bólek BAÁ-niń Abý-Dabı qalasynda ótken halyqaralyq sheıh Zaıd atyndaǵy mádenı festıvalǵa qatysyp, júldegerler qatarynan kórindi.
Sondaı-aq Shara Jıenqulova atyndaǵy besinshi respýblıkalyq bı konkýrsynda ansambl arýlary jeńimpaz atandy. Bıshi Gúlnur Qasymbek «akademy kazakhstan» halyqaralyq bı jobasynyń laýreaty atandy», deıdi Kenen Ázirbaev atyndaǵy oblystyq fılarmonııa dırektorynyń orynbasary Jandos Omarov bı ujymy jetken jetistikter týraly sóz qozǵap.
Bı óneriniń bıigine umtylǵan ansambl músheleri О́zbekstan elinde ótken «Lazgı» festıvalinde el namysyn abyroımen qorǵady. Osy bir festıvalǵa barǵandar jambyldyq bıshilerdiń óneri týraly tamsana aıtyp jatqany da jadymyzda saqtalyp qaldy.
Tájirıbeli ujymdar topqa túsken halyqaralyq dodada «Arman dala», «Erke sylqym» sekildi bılerdi kórermen nazaryna usynǵan «aqkerbezdikterdiń» ónerin kásibı mamandar joǵary baǵalady. Nátıjesinde, jambyldyq bıshiler birinshi oryn bıiginen kórinip, 5 myń dollar syıaqyny ıelendi.
Jekeleı ótken baıqaýlarda da «Aqkerbezdiń» arýlary talaı bıikti baǵyndyrǵany anyq. Máselen, elorda tórinde ótken halyqaralyq horeografııalyq dodada ansambl múshesi Aıgúl Nurymova qazaqtyń «Erke sylqym», uıǵyrdyń «Chıntáqsa» bıin jeke oryndap, birinshi oryndy ıelengen bolatyn.
Az ǵana ýaqyt buryn jambyldyq ónerpazdar Koreı eline arnaıy saparmen baryp, qazaq halqynyń tól ónerin nasıhattap qaıtty. Osyndaıda bir emes eki birdeı ujymǵa jetekshilik etetin baletmeısterge ońaı soqpaıtynyn anyq túsinesiń. Máselen, «Aqkerbezben» birge álemniń biraz elin aralaǵan Aıjan Qonarbaeva bul joly «Aısha bıbi» etnografııalyq-folklorlyq bı ujymyn bastap baryp, koreı túbeginiń halqyn ulttyq bılermen tamsandyrdy.
Rasynda da, ansambldiń ózge el sahnasynda sátti óner kórsetýi baletmeısterdiń eńbegine baılanysty ekeni daýsyz. О́ıtkeni olardy kásibı maman daıarlamasa, úlken jetistikke jetýi qıyn. Osy oraıda bı ujymdaryn bar ynta-shyntasymen daıyndap júrgen Aıjan Qonarbaevanyń eńbegi eren ekenin aıta ketken jón.
«Mundaǵy konsertke bir aıdan astam ýaqyt bederinde úzdiksiz daıyndyq jumysyn júrgizdik. Koreı halqynyń ánderin arnaıylap jazdyrdyq. Shynyn aıtý kerek, baletmeıster úshin mýzyka tańdaý óte bir mashaqaty kóp jumys. Úzdiksiz izdenistiń arqasynda úmittiń údesinen shyqqan sekildimiz. Koreı halqynyń bıin qoıǵanymyzda jergilikti jurt rıza bolysty», deıdi A. Qonarbaeva.
Qazaqstannyń bas konsýldyǵy men «Pýsan jahandyq qala» qorynyń qoldaýymen ótken konsert jergilikti halyqtyń kóńilinen shyqqany daýsyz. Qazaq ánderi men bı ónerin tamashalaǵan olar bizdiń ónerpazdarǵa alǵysyn jaýdyrdy.
«Eki el arasyndaǵy mádenı baılanystyń arta túskeni rasynda da kóńil qýantady. Qazaq ónerpazdarynyń koreı ánderin biletindigi kóńilimizge qondy, mereıimizdi asyrdy. Ádemi keshte «Aısha bıbi» etnografııalyq-folklorlyq bı ansambliniń kórsetken ónerine kópshilik tánti bolǵanyn baıqadyq. Bul – kásibı jumysqa berilgen baǵa», degen qor ókili Son Hı Synnyń sózinen de kóp dúnıeni ańǵarýǵa bolatyn sekildi.
Qalaı desek te 12 jyl buryn qurylǵan bı ujymynyń baǵyndyrǵan belesi az emes. Alaıda ansambl músheleri alǵan asýǵa qaraǵanda, qol jetkizetin bıik kóp dep esepteıdi. Munyń ózi ansambl quramyndaǵy arýlar men jigitterdiń bı ónerine ǵumyryn arnaǵanyn baıqata túsetin sekildi.
Jambyl oblysy
