Mýzeı ishindegi jádigerler qatarynda áıgili qolbasshy I.Panfılovtyń qyzy V.Panfılova arnaıy tabystaǵan zattar da barshylyq. Keńes odaǵynyń batyryna tıesili qujattar da osynda tur. Odan ózge de tarıhı muralar jetip artylady.
Mundaǵy jádigerlerdiń ishinde nemis tankisinen julyp alynǵan aına tur. Derekke sensek, TChE-31 Jambyl deposynyń mashınısi V.Zaharov surapyl soǵys kezindegi shabýyldardyń birinde eptilik tanytyp, aınany nemis tankisinen julyp alǵan. Mýzeı qyzmetkerleriniń aıtýynsha, aınaǵa «Vermaht» belgisi syzylǵan.
Jaý tankisiniń aınasyn qolǵa túsirgen Valentın Zaharov soǵys jyldarynda bronotransporter, ıaǵnı tankke qarsy qoldanylatyn qarýlar rotasyna komandır bolǵan eken. Soǵys kezinde kóptegen operasııaǵa qatysqan. Maıdan dalasynan oralǵannan keıin ol nemis tankisinen alǵan aınany júk qorjynyna salyp júrgen kórinedi. Keıinnen lokomotıv deposynda mýzeı ashylǵan kezde arnaıy tapsyrypty.
Qundy jádigerler ordasyna aınalǵan mýzeı meńgerýshisi Venera Bókenovanyń aıtýynsha, ǵasyrlyq tarıhy bar deponyń mýzeıine 51 jyl tolǵan eken. Al bólimshedegi mýzeı jumysy birneshe jyl buryn jandana túsken kórinedi.
«Lokomotıv deposyndaǵy mýzeı – elimizdegi eń kóne murajaılardyń biri. Munda kóptegen tarıhı jádiger saqtalǵan», deıdi ol.
TARAZ
