foto: otyrar.kz
Sarapshylar 38 óndirýshiniń táttilerin zerttegen, olardyń ishinde 37 reseılik brendtiń jáne bir qazaqstandyq – «Shın Laın» brendinen «Mıshka na polıýse» balmuzdaǵy bar. Zertteý nátıjesi boıynsha, 29 óndirýshiniń ónimderinen ártúrli zııandy qospalar anyqtaldy.
Sapany baqylaý uıymy Qazaqstannyń «Shın Laın» kompanııasynyń «Mıshka na polıýse» balmuzdaǵynan jáne «Ermolına» balmuzdaǵynan ishek taıaqshalaryn tapqan. Sarapshylar mundaı bakterııalar termııalyq óńdeýden ótpegen ónimderde bolýy múmkin ekenin atap ótti. Ishek taıaqshasy balmuzdaqqa ónimdi óndirý tehnologııasy buzylǵanda nemese jetkizý jáne saqtaý kezeńinde qaptamanyń bútindigi buzylǵanda túsýi múmkin.
Alaıda «Shın Laın» kompanııasy Densaýlyq saqtaý mınıstrliginiń «Sanıtarlyq-epıdemıologııalyq saraptama jáne monıtorıng ǵylymı-praktıkalyq ortalyǵy» táýelsiz zerthanasynyń qorytyndysy boıynsha «Mıshka na polıýse» balmuzdaǵynan ishek taıaqshasy tabylmaǵanyn habarlady.
«Shın-Laın kompanııasynyń sarapshylary jazda mıkrobıologııaǵa qatysty shaǵymdardyń sebebi kóterme jáne bólshek saýda núktelerindegi júkterdi tasymaldaý jáne saqtaý talaptarynyń buzylýynan bolýy múmkin dep sanaıdy», delingen kompanııanyń habarlamasynda.
