foto: telegram/QR_Su_resurstari_ministrligi
Qazaqstan Respýblıkasy Prezıdentiniń Jarlyǵymen sý sharýashylyǵy eks-mınıstri Narıman Qypshaqbaev elimizdiń áleýmettik-ekonomıkalyq damýyna qosqan erekshe úlesi men belsendi qoǵamdyq qyzmeti úshin «Otan» ordenimen marapattaldy.
Narıman Qypshaqbaev 1934 jyly 27 mamyrda Qostanaı oblysynda dúnıege kelgen. 1981-1990 jyldary Qazaq KSR Melıorasııa jáne sý sharýashylyǵy mınıstri qyzmetin atqardy. 1990-1995 jyldary - sý resýrstary jónindegi memlekettik komıtettiń tóraǵasy boldy.
Táýelsizdik jyldarynda Sý kodeksiniń jobasyn ázirleýge jetekshilik etti jáne Ortalyq Azııa memleketteri, Reseı jáne Qytaı arasyndaǵy transshekaralyq ózenderdiń sýyn paıdalaný jónindegi halyqaralyq uıym qurýǵa úlken úles qosty. Sondaı-aq, Halyqaralyq Araldy qutqarý qoryn qurý jumysynda da mańyzdy ról atqardy.
Qazirgi ýaqytta Narıman Qypshaqbaev Aral teńizi men Syrdarııa ózeni máseleleri boıynsha óz usynystaryn belsendi bólisedi. Uzaq merzimdi eńbek jolynda onnan astam marapatqa ıe boldy, olardyń arasynda memleketke sińirgen úlken úlesi úshin «Qurmet» ordeni jáne II dárejeli «Barys» ordeni bar.
«Narıman Qypshaqbaıulyna Qazaqstannyń sý sharýashylyǵyn damytýǵa qosqan zor úlesi úshin alǵys aıtqym keledi. Qaıratkerdiń kóp jyldyq jumysynyń jemisi áli kúnge deıin elimizge de, kórshi memleketterge de paıdasyn tıgizip jatyr. Sondaı-aq otandyq sý salasynyń ardagerin 90 jyldyq mereıtoıymen de quttyqtaǵym keledi. Narıman Qypshaqbaıuly Qazaqstannyń sý qaýipsizdigi jáne Respýblıkanyń sý nysandaryn qorǵaý máselelerinde áli belsendi, barlyq áriptesterine úlgi kórsetip otyr», dedi Sý resýrstary jáne ırrıgasııa mınıstri Nurjan Nurjigitov.
