Buǵan deıin jazǵanymyzdaı, óńirdegi 600-den astam oqýshynyń qoqys qaldyqtarynan jasaǵan qolóner buıymdary kórmege qoıyldy. «Kóne Taraz» etnomádenı keshenindegi kórmege jınalǵan jurtshylyq bilim alýshylardyń ónerin joǵary baǵalady. Sondaı-aq birneshe jas ǵalymnyń ınnovasııalyq jobasy da jurtshylyq tarapynan qyzyǵýshylyq týdyrdy. Ásirese qoqys qaldyqtaryn óńdeıtin zaýyt jobasy mamandardy tánti etti.
Jergilikti atqarýshy bılik taratqan málimetke júginsek, Turar Rysqulov aýdanynda «Eń belsendi turǵyn», Shý aýdanynda «Eń úzdik aýla sypyrýshy», Qordaı aýdanynda «Eń úzdik aýla», Talas aýdanynda «Eń úzdik kóshe» baıqaýy uıymdastyrylyp, jeńimpazdar baǵaly syılyqtarǵa ıe boldy.
«Taza Qazaqstan» ekologııalyq aksııasy bastalǵaly beri óńirdegi erikti jastar óz qalaýymen birqatar jumystyń sapaly atqarylýyna muryndyq bolǵanyn aıta ketken lázim.
Volonterlerdiń belsendiligimen Taraz qalasyndaǵy «Mamyr» saıabaǵynda sanıtarlyq-tazalyq jumystary júrgizildi. Sondaı-aq bastaýyn Qyrǵyz Respýblıkasynan alatyn Talas ózeniniń boıy, Aısha Bıbi, Baýyrjan Momyshuly kóshelerinde aıaldamalardy boıaý men jýý jumystary talapqa saı atqaryldy.
Budan bólek, Baızaq aýdanynyń ortalyq saıabaǵy, Jambyl aýdanyndaǵy Aısha bıbi kesenesiniń mańy, Qordaı aýdanynyń ortalyǵy men Merki aýdanyndaǵy Sypataı batyr, Sarysý aýdanyndaǵy Shoqaı datqa keseneleriniń aınalasy, Shý qalasyndaǵy temirjolshylar saıabaǵynda tazalyq jumystary júrgizildi.
Jergilikti atqarýshy bılik keltirgen derekke sensek, jyl sońyna deıin jalǵasatyn naýqanǵa jambyldyqtar aıryqsha úles qosýǵa daıyn eken. Osy jyly óńirdegi joldardy jóndeý jumystaryna 23,1 mıllıard teńge qarastyrylǵan. Bul qarajatqa 469,6 shaqyrym jol jóndeý josparlanǵan.
«Taza Qazaqstan» aksııasy aıasynda qolǵa alynǵan road-estafetasyna qatysýshylar Jambyl oblysyna da keldi. Elorda tórinen kelgen top múshelerin jambyldyq belsendiler kútip aldy. Olar eki júz shaqyrymnan astam jol boıynda tazalyq jumystaryn júrgizipti.
Jalpy, óńirdi abattandyrý, kógaldandyrý, sanıtarlyq tazalyq jumystaryna 10,3 mıllıard teńge qarajat bólingen. Turǵyn úıler men joldardy jóndeý, saıabaqtardy abattandyrý jumystary jyl sońyna deıin jalǵasady.
Jambyl oblysy
