Fotolar: Qostanaı oblysy ákimdigi
Adamdardy ortaq úıimizdi taza jáne ádemi etý, ekologııa máselelerine nazar aýdaryp, qorshaǵan ortaǵa uqypty qaraý sııaqty ortaq maqsat biriktirdi. Barlyǵy 20-dan astam túrli aksııa, fleshmob pen chellendj ótti.
Máselen, Qostanaı qalasynda «Taza Qazaqstan» respýblıkalyq aksııasy aıasynda «Taza oıyndar» jastar ekologııalyq aksııasy ótti. Uıymdastyrýshylar – «Neco» kologııalyq qory» qoǵamdyq qorymen birge «Qostanaı oblysynyń jastar resýrstyq ortalyǵy» ( JRO).
«Búgingi basty mindetimiz – jastardy ekologııalyq bastamalarǵa tartý jáne aýqymdy aksııany belsendi qoldaý», deıdi oblystyq MRK basshysy Abaı Dúısekov. Aksııa balalarǵa óte unady. «Taza oıyndardyń» logıkalyq jalǵasy bolady dep oılaımyn. Mundaı is-sharalar týǵan qalanyń nemese aýyldyń ekologııalyq jaǵdaıyn jaqsartýǵa septigin tıgizip qana qoımaı, sonymen qatar turǵyndardyń qorshaǵan ortaǵa degen jaýapkershilikpen qaraýyn oıata alatynyna senimdimin».
«Taza oıyndar» aksııasyna «Jasyl el» jastar eńbek jasaqtarynyń jaýyngerleri, JRO qyzmetkerleri men eriktileri, «Jastar Assambleıasy» RQB Qostanaı oblysy boıynsha ókildiginiń volonterleri jáne t.b. qatysty.
Halyq arasynda ortaq ekologııalyq mádenıetti qalyptastyrý estafetasyn Arqalyq qalasy men Sarykól óńiriniń turǵyndary da qoldady. «Demalys» ortalyq saıabaǵynda Arqalyq JRO qyzmetkerleri men eriktileri «Taza Arqalyq» fleshmobyn uıymdastyrdy.
Sarykóldikter de «Menshe mýsora - menshe problem» degen taqyryppen uıymdastyrylǵan aksııaǵa belsene qatysty. Qatysýshylar otbasymen jáne dostarymen ýaqyt ótkizgendi unatatyn jerleri – saıabaqtardan, alańdardan jáne jaǵalaýdaǵy aýmaqtardaǵy qoqystardy tazartty. Is-sharaǵa 50-den astam adam qatysty, onyń ishinde jergilikti turǵyndar, qoǵamdyq uıymdardyń ókilderi jáne eriktiler bar.
Denısov aýdanyn dene shynyqtyrý jáne sport mekemeleriniń sportshylary men qyzmetkerleri sport nysandaryn abattandyrý aksııasyna qatysyp, sol arqyly chellendj bastady.
«Is-sharanyń maqsaty – oblysymyzdaǵy jáne jalpy elimizde tazalyq ornatýǵa azamattardyń nazaryn aýdarý. Biz bárimiz Qazaqstannyń azamatymyz, al Denısov aýdanynyń sportshylary «Taza Qazaqstan» respýblıkalyq aksııasynan qalys qala almady. Seksııalarda jastaıynan balalardyń ekologııalyq tárbıesine kóp kóńil bólinedi, tárbıeshiler olardyń boıynda Otanǵa degen qurmet sezimin oıatady», deıdi sport bóliminiń basshysy Natalıa Fılatova.
О́z kezeginde Fedorov aýdanynda «Taza Qazaqstan» aıasynda «Eń taza balalar alańy» aksııasy ótkizilip, nátıjesinde jastar uıymdary men eriktiler aýyldardaǵy balalar men sport alańdaryn abattandyrdy.
«Birge bir kún jumys istep, trenajerlardy jóndedik, jańa oryndyqtar ornatyp, qoqys jáshikterin ornattyq. Balalar arasynda ekologııalyq taqyryptarda saıystar men vıktorınalar uıymdastyrylyp, oıyn alańdarynda tazalyq pen tártipti saqtaýdyń mańyzdylyǵy týraly áńgimeler ótkizildi», dep atap ótti «Fedorov aýdanynyń jastar resýrstyq ortalyǵy» KMM dırektory Ahmetchın Musatafa.
Qarabalyq aýdanynda ekologııa jáne qorshaǵan ortany qorǵaý máselelerine arnalǵan «Jastar Taza Qazaqstan úshin» fleshmoby ótti. Ekologııalyq kvestter men baıqaýlar uıymdastyrylyp, qatysýshylar ekologııa jáne qorshaǵan ortany qorǵaý boıynsha bilimderi men daǵdylaryn kórsete aldy. Jastarǵa tazalyqty saqtaý jáne qaldyqtardy durys basqarý mańyzdylyǵy týraly aıtyldy. Dárister qaldyqtardy suryptaý jáne bir rettik plastmassalardy paıdalanýdy azaıtý boıynsha praktıkalyq keńesterdi qamtydy.
Al Uzynkól aýdanynda «Jasyl aımaq» kúni ortalyq saıabaqta baǵaly aǵash túrleriniń 250 kósheti otyrǵyzyldy. Bul ekologııalyq aksııaǵa «Ershovskoe-2» JShS dırektory Sábıt Aǵaıdarov qarjylaı qoldaý kórsetti.
«Qamqorlyq, jerlesterdiń ómirin jaqsartý, eńbek pen turmysqa qolaıly jaǵdaı jasaýǵa umtylý – jergilikti aýylsharýashylyq taýar óndirýshileri men kásipkerlerine tán qasıet», deıdi Ershov aýyldyq okrýginiń ákimi Marııa Goıan. – Jumystar men is-sharalardyń negizgi kólemin «Ershovskoe-2» JShS atqardy. Sonyń nátıjesinde saıabaqta brýschatka, túrli demalys oryndary, júgirý joldary, ádemi óńdelgen kógaldar paıda boldy. Sondaı-aq bıýdjet qarajatyna jaryqtandyrý jáne beınebaqylaý kameralary, basketbol alańy ornatyldy, balalar oıyn alańy jabdyqtaldy».
Aýyldyq okrýg basshysynyń aıtýynsha, bıyl Ershovkaǵa taǵy da balalar oıyn alańy men syrǵanaq ornatýdy josparlap otyr.
Rýdnyı qalasynda «sporttyq ekosaıahat» uıymdastyryldy. Jastar eńbek jasaqtarynyń qatysýymen osyndaı ataýmen komanda quryldy. Jastar eńbek jasaqtary Rýdnyı qalasynyń kórikti jerlerin aralap, tabıǵatty tamashalap qana qoımaı, ormandy jáne jaǵalaýdaǵy qoqystardy tazartty. Shara aıasynda estafetalyq jarystar, fýtbol jáne voleıbol jarystary, sporttyq baǵdarlaý sharalary uıymdastyryldy, sonymen qatar qatysýshylar ekologııalyq minez-qulyq negizderi boıynsha sheberlik sabaqtaryn ótkizdi, qaldyqtardy durys suryptaýdy úırendi jáne olardyń tabıǵatqa tıgizetin áserin barynsha azaıtý joldaryn bildi.
«Bul is-shara bárimizdi biriktirdi, biz komandalyq rýhty sezindik», dep óz áserimen bólisti tımbıldıngtiń qatysýshysy jáne uıymdastyrýshysynyń biri Rýdnyı JRO dırektory Shohova Aqbilek.
Aıta ketsek, bıyl eldi mekenderdi abattandyrýǵa 11 mıllıard teńgeden astam qarjy bólingen.
Josparlanǵan 130 myńnan astam kóshettiń 51,4 myńnan astamy otyrǵyzyldy. Kósheler 90%, jaryqtandyrylyp, 108 aýylǵa 129 shaqyrym qorshaý ornatylady.
Aǵymdaǵy kezeńde (a.j. 10 sáýirinen 13 maýsymǵa deıin) tazartý jumystaryna memlekettik organdar men jeke uıymdar, sharýa qojalyqtary, jastar, volonterlik jáne úkimettik emes uıymdar, máslıhat depýtattary, PIK, MIB ókilderi tartyldy. Barlyǵy 249,6 myń adam qatysyp, 106 ruqsat etilmegen qoqys alańdary joıyldy, skver abattandyrylyp, 127,0 myń tonna qoqys shyǵaryldy, 51,4 myńnan astam aǵash otyrǵyzyldy.
