Fotolar: Aqorda
Memleket basshysynyń aıtýynsha, sońǵy otyz jylda eki el saýda, ınvestısııa, qaýipsizdik, adam quqyqtary jáne demokratııa sekildi kóptegen salada strategııalyq seriktestikti nyǵaıtty.
«Sizdiń elińiz – Qazaqstan ekonomıkasyndaǵy iri sheteldik ınvestorlardyń biri. Tikeleı sheteldik ınvestısııanyń jalpy kólemi 65 mıllıard dollardan asady. Byltyr eki memleket arasyndaǵy taýar aınalymy 4,1 mıllıard dollarǵa jetip, 30 paıyzdyq ósim kórsetti. Bul – rekordtyq kórsetkish. Qazirgi ýaqytta Qazaqstanda 600-den astam amerıkalyq kompanııa tabysty jumys istep jatyr. Men ınvestısııalyq tartymdylyqty jaqsartýǵa, ekonomıkany yryqtandyrýǵa jáne ónerkásipti damytýǵa basa mán beremin», dedi Qasym-Jomart Toqaev.
AQSh-tyń Saýda ókili Ketrın Taı qurmet kórsetkeni úshin Memleket basshysyna alǵys aıtty. Sondaı-aq saýda baılanystaryn damytýǵa jáne ekonomıkalyq yqpaldastyqty nyǵaıtý úshin qajetti jaǵdaı jasaýǵa, sonyń ishinde Saýda jáne ınvestısııalar jónindegi negizdemelik kelisimdi júzege asyrýǵa qatysty jańa tásilderdi betpe-bet talqylaýǵa múmkindik bergenine rızashylyǵyn bildirdi.
