Memlekettik tildi damytý – memleketimizdiń basym baǵyttarynyń biri. Qazirgi tańda sheteldik tele jáne radıoarnalar otandyq kontentti taratpaıdy. Osyǵan baılanysty sheteldik tele jáne radıoarnalarǵa otandyq ónimderdi jalpy tele jáne radıobaǵdarlamalardyń keminde on paıyzyna jetkizý mindettemesin bekitý usynylady.
Zańnyń negizgi erekshelikteri qandaı?
Birinshi, jýrnalısterdiń quqyqtaryn qorǵaý boıynsha qoǵamdyq jáne kásibı keńester qurylady. Bul keńes jýrnalısterdiń múddesin tolyq jetkize alatyn, qorǵaı alatyn ınstıtýt bolýǵa tıis.
Ekinshi, tótenshe jaǵdaılarda jýrnalısterdiń quqyqtaryn qorǵaý máselesi. Tótenshe jaǵdaılarda óz mindetterin atqarý kezinde jýrnalıster ómirine úlken qaýip tónýi múmkin. Budan bylaı BAQ jańa zańǵa sáıkes óz qyzmetkerlerin álemdik jetekshi aqparat quraldary tájirıbesine saı qajetti qorǵanys quraldarymen qamtamasyz etýge mindetti.
Úshinshi, jýrnalıstik etıka. Jýrnalısterdiń qyzmeti qoǵamdaǵy salamatty atmosferany damytýǵa jáne qaýipsiz aqparattyq keńistikti qalyptastyrýdyń kepili.
Tórtinshi, otandyq BAQ-ty qarjylyq qoldaý sapaly aqparattyq ónim shyǵarýǵa múmkindik beredi.
Besinshi, ýákiletti organǵa BAQ-ty jalpyǵa ortaq, ulttyq, mádenı jáne otbasylyq qundylyqtardyń buzylýyna monıtorıng jasaý quzyreti berilmek.
Altynshy, memlekettik aqparattyq saıasat jónindegi respýblıkalyq komıssııanyń quramyna buqaralyq aqparat quraldary salasyndaǵy qoǵamdyq birlestikterdiń ókilderi enedi.
Jetinshi, memlekettik jáne memlekettik emes BAQ uǵymdary ajyratylady. Ol qoǵamdyq uıymdar men BAQ sarapshylarynyń usynystary negizinde qarastyryldy.
Segizinshi, BAQ-ty memlekettik qarjylandyrý máselesindegi ashyqtyq. Zań jobasynda qazirdiń ózinde BAQ saıasatynyń ashyqtyǵy men tıimdiligin arttyrýǵa baǵyttalǵan granttyq qarjylandyrý tetigi qarastyrylǵan.
Toǵyzynshy, akkredıtteý kartasy. Qazirgi tańda jýrnalıster túrli is-sharalarǵa qol jetkizý úshin memlekettik organdarǵa júıeli túrde ótinishter men qujattardy tapsyryp otyrýy kerek. Alaıda keıde bul úrdis uzaqqa sozylady jáne bıýrokratııalyq kedergilerge tap bolady. Akkredıtteý kartasy sıfrlyq platforma arqyly beriledi dep josparlanyp otyr. Alańda memlekettik organdardyń is-sharalary ótedi, jýrnalıster bir-eki mınýt ishinde ótinish bere alady. Bul olardyń aqparat kózderine qoljetimdiligin jeńildetedi.
Aıgúl QAPBAROVA,
Senat depýtaty
