Jambyl aýdanynda da izdeniske qumar bilim alýshylar az emes. Olar túrli ınnovasııalyq jobalar ázirlep, jańashyldyqqa jany qumar ekenin baıqatty. Ásirese Iýrıı Gagarın atyndaǵy mektep-lıseıiniń oqýshylary sý tapshylyǵyna qarsy kúreske beldi bekem býyp kirisken sekildi.
Segizinshi synyp oqýshylary Sábına Jarqynbek pen Maralbek Ásembekti aýyldaǵy aǵyn sýdyń tapshylyǵy aıtarlyqtaı alańdatqan kórinedi. Olar qurǵaqshylyq kezinde de aýyl sharýashylyǵynyń órkendeýine súbeli úles qosatyn ınnovasııalyq joba oılap tapty. Tyń jobany óndiriske qosqysy keletin jasóspirimder qolǵa alǵan isi nátıje berse, basqa da jobalarǵa den qoıýǵa nıetti.
«Sońǵy jyldary oryn alǵan qurǵaqshylyq kimdi de bolsyn, tolǵandyrmaı qoımaıdy. Aǵyn sýdyń tapshylyǵymen kúresetin kez kelip jetti. Biz oılap tapqan joba salany qurǵaqshylyqtan qutqarýǵa baǵyttalǵanyn aıta ketken lázim. Aýyl sharýashylyǵyna ańsary aýǵan fermerler men kásipkerler tarapynan qyzyǵýshylyq týady degen úmitimiz basym.
О́simdikti gıdroponıkalyq jolmen ósirý – elimizdiń sý tapshylyǵy baıqalatyn aımaqtaryndaǵy fermerler úshin tıimdi sheshim. Osyny qaperden shyǵarmaǵan jón. Sondaı-aq malǵa arnalǵan jemshópti ázirleýge bar bolǵany jeti kún jetkilikti ekenin atap ótkimiz keledi. Bul óz kezeginde mal bordaqylaýmen aınalysatyn kásipkerler úshin tıimdi ekeni sózsiz. Sondyqtan da olar bizdiń jobaǵa qoldaý bildiredi degen oıdamyz», deıdi jańashyldyqqa bet burǵan talantty jastar.
Jańa jobany jetildirýge kirisken oqýshylardyń jetekshisi Anar Aıtekova ınnovasııalyq jobanyń keleshegi bar ekenine senimi zor. Onyń aıtýynsha, ınnovasııalyq joba tek qurǵaqshylyq máselesin sheship qoımaı, ekologııalyq máselelerdiń de oń sheshim tabýyna yqpal etedi eken.
Tereń izdeniske kirisken oqýshylar ózderi qolǵa alǵan jobanyń tıimdiligin kez kelgen jerde dáleldeýge ázir. Olar ózderi qolǵa alǵan istiń nátıjeli bolǵanyn qalaıdy.
Jambyl oblysy
