Mınıstrliktiń habarlaýynsha, abıtýrıentter kolledjde oqýǵa eki tásilmen ótinim bere alady. Onyń birinshisi – dástúrli, ıaǵnı qaǵaz túrinde tapsyrý, ekinshisi – egov.kz portaly arqyly elektrondy nysanda ótinim qaldyrý. Birinshi tásilmen 25 maýsymnan, egov.kz portaly arqyly 1 shildeden bastap qujat ótkizýge bolady.
Talapkerlerdiń bilimine qaraı da qujat qabyldaý merzimi ártúrli. Dálirek aıtqanda, negizgi bilim alǵan 9-synyp bitirýshiler úshin qujat qabyldaý merzimi 25 maýsymnan 18 tamyzǵa deıin, al negizgi orta bilim alǵan 11-synyp bitirýshiler úshin 25 maýsymnan 20 tamyzǵa deıin jalǵasady.
Osyǵan qosa qujat qabyldaýda keıbir mamandyqtarǵa da belgilengen naqty merzim bar. Mysaly, shyǵarmashylyq mamandyqtar boıynsha 25 maýsymnan 20 shildege deıin; pedagogıkalyq jáne medısınalyq mamandyqtar boıynsha 25 maýsymnan 15 tamyzǵa deıin qujat qabyldanady.
Orta býyn mamandyqtary men qoldanbaly bakalavrǵa túsýshiler úshin oqýǵa qabyldaý attestattyń ortasha baly negizinde júrgiziledi. Baǵalap bólý mindetti jáne beıindi pánderdiń ortasha konkýrstyq baly negizinde avtomattandyrylǵan aqparattyq júıe arqyly júzege asyrylady. Al jumysshy mamandyǵyna túsetin túlekter áńgimelesý qorytyndysy boıynsha qabyldanady.
Pedagogıkalyq, medısınalyq jáne shyǵarmashylyq mamandyqtar boıynsha oqýǵa túsetin túlekter arnaıy jáne shyǵarmashylyq emtıhandar tapsyrady nemese áńgimelesýden ótedi. Ony qabyldaý komıssııalary júrgizedi. Oqýǵa túsýshiler úshin konkýrstar 19-25 tamyz, óner jáne mádenıet mamandyqtary boıynsha 29 shilde – 2 tamyz aralyǵynda ótedi.
Aıta ketý kerek, talapkerler qujatyn birden 4 kolledjge 4 mamandyq boıynsha tapsyra alady. Bıyl memlekettik bilim berý tapsyrysy boıynsha barlyǵy 145 myń abıtýrıentti oqýǵa qabyldaý josparlanǵan, bul ótken jyldan 10 myń orynǵa artyq.
