Umyt bola bastaǵan baıyrǵy mýzykalyq aspaptardy el arasynda keńinen nasıhattaý maqsatynda uıymdastyrylǵan baıqaýǵa jalpy sany 12 ansambl qatysty. Baıqaý barysynda ansambl músheleri tórt shyǵarmadan oryndap, ózderiniń kásibı deńgeılerin kórsetip baqty. Barlyq ujym óner dodasyna aıryqsha daıyndyqpen kelgeni kórinip turdy.
Is-sharanyń ashylý saltanatynda sóz alǵan oblys ákimdigi mádenıet, arhıvter jáne qujattama basqarmasynyń basshysy Erlan Júnisbaı Taraz tórinde dástúrli túrde ótkizilip kele jatqan baıqaý bıyl óńirdiń 85 jyldyq mereıtoıy men ult maqtanyshy Kenen Ázirbaevtyń 140 jyldyǵyna arnalǵanyn tilge tıek etti. Dástúrli ónerdi dáripteý maqsatynda qolǵa alynǵan is-shara aldaǵy ýaqytta da jalǵasyn taba beretinin jetkizip, qatysýshy ujymdarǵa sáttilik tiledi.
Jambyldyq ónersúıer qaýym jetigen men sazsyrnaıdyń, sherter men qylqobyzdyń únin saǵynǵanyn aıqyn ańǵardyq. Ulttyq ónerge ańsary aýǵan jergilikti jurt elimizdiń ár qıyrynan kelgen mártebeli meımandarǵa aıamaı qoshemet kórsetti.
Respýblıkalyq deńgeıde ótken óner alamanynda keıbir ujymdardyń bási joǵary ekeni áýelden-aq baıqalyp turdy desek, qatelese qoımaspyz. Máselen, Mańǵystaý oblysynan kelgen «Naýaly saz», jergilikti «Qazaq eli» bastaǵan birneshe ansambldiń deńgeıi joǵary ekenin mamandar da aıtyp jatty. Kórermender de attary atalǵan óner ujymdaryna aıryqsha iltıpat kórsetkenin baıqadyq.
Joǵary deńgeıde ótken óner baıqaýynda jeńilgender joq desek te bolady. О́ıtkeni úzdik úshtiktiń qataryna qosyla almaǵan birneshe ansambl yntalandyrý syılyǵyna ıe boldy. Olarǵa 150 myń teńgeniń sertıfıkaty tabystaldy.
Baıqaý qorytyndysynda úzdikter qataryna ilinip, úshinshi oryn ıelengen oraldyq «Bastaý», almatylyq «Qobyz saryny» óner ujymdaryna 500 myń teńgeniń sertıfıkaty berilse, ekinshi oryn alǵan túrkistandyq «Aqsý» folklorlyq ansambline 600 myń teńgeniń sertıfıkaty buıyrdy. Kópshilik kútkendeı birinshi oryndy mańǵystaýlyq «Naýaly saz» ansambli ıelendi. Ujymǵa 800 myń teńgeniń sertıfıkaty tabystaldy. Al bas júldeni ıelengen jambyldyq «Qazaq eli» etno toby 1 mıllıon teńgeni qanjyǵasyna baılady.
Jambyl oblysy
