Foto: joltap.kz
Atalǵan jobanyń negizgi ereksheligi – mamandar azamattardyń kelýin kútpeı, kerisinshe, saýda ortalyqtary sekildi adam kóp júretin jerlerge shyǵyp, keńes beredi. Bul baǵytta óńirlerde atqarylyp jatqan sharalar Premer-mınıstrdiń orynbasary Tamara Dúısenovanyń tóraǵalyǵymen ótken keńeste talqylandy.
Qaraǵandy oblysynda joba 25 maýsymnan bastap júzege asyrylyp jatyr. Tórt birdeı keńes berý pýnkti ashylǵan. Olardyń úsheýi oblys ortalyǵynda, bireýi Temirtaý qalasynda ornalasqan. Munda arnaıy oqytylǵan 8 maman qyzmet kórsetedi.
«Joba aıasynda 15 maýsymda komıýnıtı-ortalyq ashyldy. Munda jastar úshin dybys jáne podakst jazý stýdııalary jumys isteıtin bolady. Iаǵnı olarǵa kreatıvti ónim shyǵarýǵa qatysty trenıngter uıymdastyrylyp, daǵdylardy ıgerýge múmkindik beriledi. Biz, sondaı-aq kómekke júgingen azamattarǵa 5 kolledj bazasynda qysqamerzimdi oqý kýrstaryn usynyp otyrmyz. 1 tamyzdan bastap, meńgeretin mamandyqtardyń kúrdeliligine qaraı uzaqtyǵy 5-30 kún aralyǵyndaǵy kýrstar uıymdastyrylady. Sońynda sertıfıkat tabystalyp, jumysqa ornalastyrylady», dedi oblys ákiminiń orynbasary Ermek Alpysov.
Sonymen qatar óńirde 60-50-50 nómirli baılanys ortalyǵy da jumys istep jatyr. Qoldanýshylardyń yńǵaılylyǵy úshin Telegram-arna iske qosylǵan.
Almaty jobasy aıasynda qurylǵan Telegram-bot ózindik aqparattyq júıe ispetti. Munda jazǵan azamatqa birden bos jumys oryndary men tegin onlaın-kýrstar tizbesi usynylady. Ol úshin bot «jasalmaty.kz» jastar portalymen ıntegrasııalanǵan. Qyzmetter azamattarǵa proaktıvti rejimde usynylady.
«Biz Astanada júzege asyp jatqan «Jol Tap» negizinde jumys isteýdi uıǵardyq. Alaıda Almaty erekshelikterin eskere otyryp, birqatar talapty ózgerttik. Qaladaǵy 8 komıýnıtı-ortalyqta keńes berý núkteleri ashyldy. Oǵan qosymsha iri saýda ortalyqtary ishinen 3 pýnkt uıymdastyryldy. Jobany tolyǵymen 1 shildeden bastap júzege asyrýǵa daıynbyz», dedi qalalyq jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov.
Shymkentte joba 25 mamyrdan bastap júzege asyrylyp jatyr. Osy ýaqyt aralyǵynda 10 keńes berý pýnktinde 183 azamat túsindirý jumystarymen qamtyldy. Qala ákiminiń orynbasary Sársen Quranbektiń sózinshe, olardyń birtalaıy áleýmettik kómek alýshylar tizimine tirkelse, endi biri turǵyn úı kezegine qoıylǵan. Birqatar azamat kásiptik oqytý sharalarymen qamtyldy.
Al Aqtóbe oblysynda joba arqyly jumysqa ornalastyrýdyń 2 nusqasy júzege asyrylmaqshy. Oblystyń jastar saıasaty basqarmasynyń basshysy Mırhan Ermaǵanbetovtiń aıtýynsha, búginde óńirdegi shaǵyn jáne orta bıznes ókilderimen kelissózder júrgizilgen. Nátıjesinde, 40 kásipker jobaǵa qatysýshylar úshin sheberlik saǵattaryn ótkizip, keıin olardy jumysqa ornalastyrýǵa kelisken.
«Sondaı-aq biz ındýstrıaldy damý basqarmasy arqyly ónerkásip oryndaryndaǵy vakansııalardy usynbaqpyz. Qazirgi tańda aldyn ala kelisim bar. Bul rette eńbek mobıldiligi ortalyǵynyń múmkindikterin paıdalaný kózdelip otyr», dedi M.Ermaǵanbetov.
О́ńirde joba 15 shildeden bastap júzege asyrylmaqshy. Onyń sheńberinde oblys ortalyǵynyń halyq kóp shoǵyrlanǵan aýmaqtarynda 5 modýldi pýnkt ornatý qarastyrylǵan.
«Joba ár óńirdiń óz erekshelikterine qaraı júzege asyrylyp keledi. Degenmen oń tájirıbelermen ózara almasý qajet dep oılaımyn. Eń negizgi maqsat – azamattardy jumyspen qamtý. Bul rette barlyq múmkindikterdi paıdalanýymyz kerek», dedi T.Dúısenova.
