Sýretti túsirgen – Erlan OMAR, «EQ»
Bul sıfrly kórme – qorshaǵan ortany qorǵaýǵa jáne kórikti jerlerdi saqtaýǵa arnalǵan. Atalǵan is-shara Manhettendegi (Nıý-Iork) «The Canvas 3.0» galereıasy men «Qazaq National Parks» jobasynyń (seriktes) qoldaýymen uıymdastyryldy.
«Biz – qorshaǵan ortaǵa qurmetpen qaraıtyn elmiz. «Winds of Change» kórmesi – bizdiń ulttyq saıabaqtarymyzdyń keremetin kórsetip qana qoımaı, álemdik saıahatshylarǵa nasıhattap otyr. Ekinshiden, biz mundaı damyǵan eldermen kúsh biriktirý arqyly qorshaǵan ortany qorǵaýǵa, tabıǵatty saqtaýǵa mol tájirıbe almasamyz. Sonymen qatar jahandyq ekologııanyń jaqsarýyna úles qosa alamyz», deıdi Týrızm jáne sport vıse-mınıstri Erjan Erkinbaev.
«Winds of Change» kórmesi amerıkalyq natýralısterge elimizdiń ulttyq tabıǵı ásem saıabaqtaryn jáne biregeı kreatıvti jobalaryn tanystyrady.
«Kórmege qoıylǵan «Ile-Alataý tarıhy» kitaby kelýshilerdiń qyzyǵýshylyǵyn oıatty. Onda ulttyq saıabaqqa qatysty óz ómirin tabıǵatpen baılanystyrǵan adamdar: ǵalymdar, zoologter, botanıkter, arheologter, glıasıologter, astronomdar, ormanshylar, alpınıster, týrıster, eriktilerdiń qyzyqty oqıǵalary berilgen. Al «Adam jáne tabıǵat» lend-art jobasy qazirgi adamdar tabıǵattyń bir bóligi bolyp qala ma, joq pa degen máseleni zertteıtin joba. Aıýsaı shatqalynda týrıster qaldyrǵan qoqystar kórsetiledi», deıdi «Qazaq National Parks» seriktestiginiń dırektory Dınara Gýjavına.
Kórmege kelýshiler «Sharyn», «Altynemel», «Ile-Alataý» qatarly ulttyq saıabaqtardyń sımvoldyq ónimderin satyp alypty. Jalpy, ulttyq saıabaqtarymyzdyń nasıhatyn jasaıtyn jáne týrıstik ınfraqurylymdy damytýmen aınalysatyn birden-bir oryn – ol «Qazaq National Parks» seriktestigi ekenin aıta ketken jón.
«Elimizdegi ulttyq saıabaqtar dese, jýsannyń ısi, orman sybdyry jáne taý bókterindegi qulpyrǵan gúlder esimizge túsedi. «Winds of Change» kórmesinde kelýshilerge osyny sezdirdik. Bizdiń saıabaqtar sonysymen talaılardy qyzyqtyryp tur», deıdi kórme jetekshisi Nargız Magaeva.
Aıtpaqshy, shyǵystaǵy Katonqaraǵaı ulttyq saıabaǵy – IýNESKO-nyń Búkilálemdik muralar tizimine engizilgen jáne Dúnıejúzilik jabaıy tabıǵat qorynyń basym ekoóńirleriniń biri dep tanylǵany belgili. Talaıdy tamsandyrǵan ásem baq bıyl naýryzda «Green destinations Story Awards» baıqaýynda jeńimpazdar qatarynan kóringeni el esinde bolsa kerek. Baıqaý «ITB Berlin» iri álemdik týrıstik kórmesinde ótken edi.
Týrızm – tabysy tasqyndap turǵan sala. Qazir álemde kirisiniń 90 paıyzyn osy saladan túsken qarajat qalyptastyratyn elder jeterlik. Bizdiń kúnimiz buǵan qarap turmasa da, artyq dáýlet bas jarmasy anyq. Elimizde ondaı qosymsha tabys kózi bolarlyq týrıstik áleýet mol. Ony mine, Nıý-Iork tórinde taǵy bir dáleldep berdik.
