Foto: newsweekespanol.com
Qazaqstanda memlekettik qyzmetshiler jańa ádispen irikteledi
Memlekettik qyzmet isteri agenttiginiń málimetinshe, memlekettik qyzmetke irikteýdiń ashyq ótýin qamtamasyz etý maqsatynda byltyr e-Qyzmet.gov.kz syrtqy ınternet-portaly iske qosylyp, irikteýdiń jańa erejeleri ázirlendi.
Qazir portalǵa 22 memlekettik organ qosyldy. 1 shildede júıe 22 memlekettik organda qosymsha engiziledi.
Jańa jobanyń ereksheligi - azamattar kez kelgen ýaqytta jáne ınternetke qoljetimdi kez kelgen jerden onlaın rejıminde baıqaýdyń barlyq kezeńine qatysa alady.
Nesıe berýdiń jańa erejeleri
Sondaı-aq kollektorlarǵa qaryz berýge eki jyldyq moratorıı engizilip jatyr. Osy kezeńde nesıe berýshiler merzimi ótken nesıelerdi kollektorlarǵa bere almaıdy. Qaryzdary kollektorlarǵa berilgen qaryz alýshylardy qoldaý úshin 2024 jylǵy qazannan bastap kollektorlardyń bereshekti retteý rásimderin júrgizý mindeti engiziledi.
Sonymen qatar 1 shildeden bastap azamattar jubaıynyń kelisiminsiz nesıe ala almaıdy.
Internet pen uıaly baılanys tarıfteriniń ósýi
«Qazaqtelekom» 1 shildeden bastap muraǵat jelisiniń 51 tarıftik jospary boıynsha tarıfterdiń kóterilgenin habarlady. Bul úıdegi ınternet pen uıaly baılanystyń pakettik qyzmetterine arnalǵan muraǵattalǵan tarıftik josparlaryna qatysty.
Kúdikti aqsha aýdarymdaryn buǵattaý
Ulttyq bank qarjylyq alaıaqtyqpen kúresý úshin Alaıaqtyqqa qarsy ortalyq qurylǵanyn habarlady. Alaıaqtyqqa qarsy ortalyq 22 shildeden bastap - sıfrlandyrý máseleleri týraly tıisti zań kúshine engen sátten bastap kúdikti aqsha aýdarymdaryna tosqaýyl qoıýdy bastaıdy.
Júıeniń negizgi mindeti - azamattardy alaıatardan qorǵaý. Kúdikti aqshalaı tranzaksııalarǵa tosqaýyl qoıylady.
«Alaıaqtyqqa qarsy ortalyqqa barlyq bankterdiń, tólem uıymdarynyń, Ishki ister mınıstrliginiń, Qarjy monıtorıngi agenttiginiń, Qarjy naryǵyn retteý jáne damytý agenttiginiń, Bas prokýratýranyń, uıaly baılanys operatorlarynyń aqparattyq júıeleri qosylady. Bul fýnksııa 2024 jylǵy shildede tolyǵymen engiziledi dep josparlanǵan», dedi Premer-mınıstr Oljas Bektenov.
Temeki baǵasynyń ósýi
Qarjy mınıstrliginiń buıryǵyna sáıkes, 20 (jıyrma) fıltrli, fıltrsiz sıgaretke, papırostarǵa, sıgarıllalarǵa jáne qyzdyrylatyn temekisi bar buıymdarǵa: 2024 jylǵy 1 shildeden bastap 2024 jylǵy 31 jeltoqsandy qosa alǵanǵa deıin 820 teńge; 2025 jylǵy 1 qańtardan bastap 870 teńge bolady.
Suıytylǵan gazdyń jańa baǵasy
1 shildeden bastap Qazaqstanda suıytylǵan gaz baǵasy ósedi dep josparlanǵan.
Qazaqstannyń oblystary men qalalarynda jańa baǵalar mynadaı deńgeıde belgilenedi:
- Astana – 84 teńge;
- Almaty – 89 teńge;
- Aqtóbe oblysy – 59 teńge;
- Atyraý oblysy – 59 teńge;
- Aqmola oblysyna – 84 teńge;
- Almaty oblysyna – 89 teńge;
- Shyǵys Qazaqstan oblysyna – 84 teńge;
- Jambyl oblysyna – 78 teńge;
- Batys Qazaqstan oblysyna – 70 teńge;
- Qostanaı oblysyna – 84 teńge;
- Qyzylorda oblysy – 70 teńge;
- Qaraǵandy oblysy – 84 teńge;
- Mańǵystaý oblysy – 59 teńge;
- Pavlodar oblysyna – 81 teńge;
- Soltústik Qazaqstan oblysyna – 89 teńge;
- Túrkistan oblysyna – 70 teńge;
- Shymkent – 70 teńge;
- Abaı aýdany – 84 teńge;
- Jetisý oblysyna – 84 teńge;
- Ulytaý oblysy – 84 teńge.
Mınıstrlik gaz baǵasyn qaıta qaraý qajetin birneshe sebeptermen túsindirdi. Atap aıtqanda, bul sheshim tabıǵı gaz óndirýdiń tıimsizdigine baılanysty.
Energetıka mınıstrligi Qazaqstan TMD elderindegi gaz baǵasynyń eń tómeni – 54 teńgeden 86 teńgege deıin ekenin, al Reseıde bir lıtr gazdyń baǵasy - 132 teńge, Ázerbaıjanda – 171 teńge, Tájikstanda – 273 teńge ekenin atap ótti.
Dárilerdi tańbalaý
2024 jylǵy 1 shildeden bastap Qazaqstanda barlyq dárilik zatty mindetti túrde tańbalaý jáne qadaǵalaý engiziledi. Dúnıejúzilik densaýlyq saqtaý uıymynyń málimetinshe, damýshy elderde dári-dármektiń árbir 10-shy paketi jalǵan. Elimizde kontrafaktilik dárilerdiń aınalymy 10-12 paıyzdan asady. Bul tek ekonomıkalyq másele emes, ulttyń ómiri men densaýlyǵyna tikeleı qaýip tóndiredi.
Zergerlik buıymdardy sıfrlyq tańbalaý
Zergerlik buıymdardy sandyq tańbalaý 1 shildeden bastap zergerlik buıymdarǵa mindetti sıfrlyq tańbalaý engiziledi: olarǵa taýar belgisi, meken-jaıy, buıymnyń ataýy, artıkýl, synama, massa, ólshemder, kiristirýler týraly aqparat kórsetiletin arnaıy belgi qosa beriledi. Sondaı-aq saraptama aktilerin sıfrlandyrý jáne olardy sıfrlyq tańbalaýmen baılanystyrý josparlanyp jatyr.
Sıfrlyq tańbalaý jáne taýarlardy qadaǵalaý júıesiniń basty maqsaty - Qazaqstandaǵy taýar aınalymyn ashyq etý.
Zeınetaqy jarnalaryn tóleý erejelerindegi ózgerister
Úkimet qaýlysy boıynsha mindetti zeınetaqy jarnalaryn, mindetti kásiptik zeınetaqy jarnalaryn, jumys berýshiniń mindetti zeınetaqy jarnalaryn tóleý qaǵıdalaryna ózgerister men tolyqtyrýlar engiziledi.
Tıisti erejelerge ózgertýler ISO 20022 qarjylyq habarlamalardyń halyqaralyq standartyna kóshýmen baılanysty.
Demalys
2024 jylǵy shildede el azamattary jyl saıyn 6 shildede toılanatyn Astana kúnin merekeleýdiń arqasynda taǵy bir demalys kúni qosylady. Bul kún - memlekettik mereke jáne bıyl ol senbige túsip tur, sondyqtan mereke 8 shilde dúısenbige aýystyryldy. Osylaısha, aptasyna bes kún jumys isteıtinder qatarynan úsh kún demalady: 6, 7 jáne 8 shilde.
Aptasyna 6 kún jumys isteıtinder úshin 8 shilde ádettegi jumys kúni bolady.
Aýa raıy
«Qazgıdromet» shildede aýa raıy salqyndaıtynyn aıtty. Respýblıkanyń basym bóliginde ótkinshi jańbyr jaýyp, naızaǵaı oınaıdy, ekpindi jel soǵady, burshaq jaýýy múmkin.
Negizgi temperatýralyq fon joǵary bolady dep boljanady: batys jáne ońtústik oblystarda: +30+38, keı kúnderi termometr 40-tan 45 gradýsqa deıin jetedi. Qazaqstannyń soltústiginde, ortalyǵynda jáne shyǵysynda aýa temperatýrasy +25+38 gradýs shamasynda bolady dep boljanyp otyr.
