Foto: svetland-oil.kz
Qazaqstan men Qytaı basshylary Transkaspıı halyqaralyq kólik baǵyty boıynsha júk kólikteri men temirjol konteınerlerin jóneltý rásimine telekópir rejıminde qatysty.
Is-shara qatysýshylaryna Uly Jibek joly baǵytymen júretin tranzıttik reıs týraly beınerolık kórsetildi. Is-shara sońynda Prezıdent Qasym-Jomart Toqaev pen Tóraǵa Sı Szınpın júk paromdarynyń qozǵalysyn iske qosty.
Kerýen Qazaqstannyń 8 óńirinen ótip, búgin Quryq portyna jetti. Kólik kerýeniniń sapary 10 kúndi quraıdy, al uzyndyǵy - 4 800 shaqyrym.
Bul baǵyt qos el arasyndaǵy ekonomıkalyq baılanysty odan ári nyǵaıtýǵa septigin tıgizedi.
Kólik komıtetiniń tóraǵasy Altaı Áli Quryq portynan tikeleı baılanysqa shyǵyp, Qytaıdan shyqqan alǵashqy kólik kerýeni Aqtaý men Quryq porttaryna kelip jetkenin habarlady.
«Qytaı elinen shyqqan júk kerýeni men konteıner poıyzy Aqtaý men Quryq porttaryna kelip jetti. Olar Ázerbaıjan, Grýzııa, Túrkııa jáne Eýropa elderine bet aldy. Bul - Uly Jibek jolynyń qaıta jańǵyrýy. Kerýen attanýǵa daıyn», dedi Kólik komıtetiniń tóraǵasy.
Altaı Áli eki eldiń basshylarynan kemelerdiń júzýine ruqsat berýin surady.
