Sýretterdi túsirgen – Aqádil Rysmahan
7 shilde kúni saǵat 17.20 shamasynda nóser jaýynnan keıin qalyptasqan kólbeý aǵyn sý taý bókterinde ornalasqan turǵyndardy ábigerge saldy. Birqatar aýla, birshama úıdiń ishine sý kirdi. Sarysýlyqtardy alańdatqan másele jergilikti atqarýshy bılikti de beıjaı qaldyrǵan joq. Birinshi kúni óńir basshysynyń orynbasary Qanatbek Mádibek bastap, jaýapty basqarma basshylary qoshtap oqıǵa ornynan tabyldy. Jaǵdaımen tolyqqandy tanysty.
Kóldeneńnen kelgen kólbeý aǵyn Baıqadam aýyldyq okrýgindegi Saýdakent aýyly turǵyndarynyń júıkesine shı júgirtti. Bes kóshede aýyq-aýyq jaryq sónip, birneshe márte qaıta janǵan.
Jaýapty qurylym qyzmetkerleri olqylyqty joıý boıynsha jumysqa jedel kirisken. Nátıjesinde, bastapqyda 50 maman, 17 birlik tehnıka jumyldyrylyp, 11 motopompa jáne dron qoldaný arqyly sýdy tazartý jumystary júrgizilgen. Al «Jańatas – Saýdakent» tas joly sý basý qaýpine baılanysty ýaqytsha jabylǵan.
Kelesi kúni óńir basshysy Erbol Qarashókeev oqıǵa ornyna arnaıy at basyn buryp, sý alǵan aýlalardy aralady, qalyptasqan jaǵdaımen tanysty, jergilikti jurtpen pikirlesti. Jaýapty mamandarǵa jaǵdaıdy jedel retteý boıynsha tapsyrma berdi.
Jergilikti atqarýshy bılik bastapqyda 200-den astam úıdiń aýlasyna, 21 úıdiń ishine sý kirgenin habarlaǵan bolatyn. Kelesi kúni bul kórsetkish ózgergen. Naqtyraq aıtar bolsaq, birshama ósken. Sońǵy derekke júginsek, 400-den astam úıdiń aýlasyn, 47 úıdiń ishin sý alǵan eken. Árıne, mamandardyń jedel iske kirisýiniń arqasynda júıeli jumys júrgizilgenin aıta ketken jón.
«Aımaqtaǵy jaǵdaı nazardan tys qalmaıdy. Arnaıy komıssııa qurylyp, turǵyndarǵa tıisti kómek kórsetiledi. Zardap shekken nysandarǵa zań aıasynda qajetti qoldaý kórsetýge ázirmiz. Biz bul qıyndyqty jumylǵan judyryqtaı birge eńseretinimiz daýsyz», dedi oblys ákimi. Qazirgi kezde Sarysý aýdanynda jaǵdaı turaqtalǵanyn aıta ketken lázim. Adam jáne mal shyǵyny bolǵan joq.
Jergilikti atqarýshy bılik keltirgen málimetke súıensek, tótenshe jaǵdaılar departamentiniń qyzmetkerleri aýlalar men úılerdi tazartý boıynsha úzdiksiz jumys istep jatyr.
8 shilde kúni ymyrt úıirilgenge deıin 18 600 tekshe metr sý sorylǵan eken. Jalpy sany 128 aýla men 47 úıdiń ishi sýdan tazartylǵan. Jańatas qalasy mańyndaǵy eki eldi mekende jaryq qosylǵan.
Tótenshe jaǵdaı jergilikti bılikti taǵy bir synap alǵany anyq. Jańatastaǵy jaǵdaıǵa tas-túıin daıyndyqpen barǵan mamandar qazir qoldan kelgen jumysty atqaryp jatyr. Barlyq materıaldyq shyǵyndy zerdeleý boıynsha arnaıy jumysshy top qurylǵan.
«Zardap shekken turǵyndar úshin 105 oryndyq eki qabyldaý pýnkti ázirlengen, oǵan 12 adam ornalystyryldy. Qazir olar óz erkimen úıine qaıtty. «Jańatas–Saýdakent» tas joly ashyq. Tótenshe jaǵdaıdy joıýǵa azamattyq qorǵaý qyzmetterinen 282 adam, 64 tehnıka, 35 motopompa jáne 1 ushý apparaty jumyldyrylǵan», delingen oblys ákimdigi baspasóz qyzmeti taratqan aqparatta.
Jambyl oblysynda nóser jaýyn saldarynan ekinshi aýdannyń eldi meken turǵyndary zardap shegip otyr. Sáýir aıynda Jasórkende otyz aýlany sý alǵan bolsa, Sarysý aýdanynda tórt júzden astam aýlaǵa sý kirgen. Árıne, ońaı emes. Alaıda turǵyndarǵa alańdaýǵa negiz joq. О́ıtkeni barlyq shyǵyn eseptelip jatyr. Jergilikti bılik bul máseleni jedel sheshýge qulyqty.
Jambyl oblysy,
Sarysý aýdany
