Sorǵy stansasynyń aýmaǵynda Úkimet basshysy megapolıstiń joǵarǵy aýdandaryn sýmen qamtamasyz etýdiń rezervtik júıesin salý jumysynyń qarqynyn tekserdi. Jobanyń mańyzy jerústi sýlaryna táýeldilikke baılanysty. Buǵan deıin 2023 jylǵy 18 tamyzda Almaty qalasyn damytý máseleleri jónindegi keńeste seldiń kóbeıýi jáne ózen sýy laılanýynyń artýyna baılanysty Prezıdent qalanyń joǵarǵy bóligine aýyzsý berýdi shektemeý úshin atalǵan máseleni sheshýge tapsyrma bergen bolatyn. Máselen, Almaty 6 negizgi kózden: Úlken jáne Kishi Almaty, Aqsaı, Qarǵaly ózenderinen jáne Almaty men Talǵar ken oryndarynyń jerasty sý jınaǵyshy arqyly sýmen qamtamasyz etiledi.
Qala turǵyndaryn sýmen turaqty ári úzdiksiz qamtamasyz etý maqsatynda Talǵar jerasty sý jınaǵyshynan táýligine 17 myń tekshe metr kóleminde qoldanystaǵy jelilerdi qosymsha tolyqtyrýǵa jaǵdaı jasaldy. Joba qýattylyǵy 15 myń tekshe metr bolatyn jańa 6 uńǵyma salýdy jáne qýattylyqty 60%-ǵa arttyra otyryp, 6 sorǵy stansasyndaǵy 14 sorǵyny tolyq aýystyrýdy kózdeıdi. Qala ákiminiń orynbasary Asqar Ámrın Prezıdenttiń rezervtik júıe týraly tapsyrmasynyń oryndalǵanyn baıandady.
Sonymen qatar Premer-mınıstrge Almaty qalasynyń barlyq turǵynyn ortalyqtandyrylǵan sýmen qamtý boıynsha júrgizilip jatqan jumys barysy týraly baıandaldy. О́tken jyly 117 shaqyrym sý qubyry salynyp, 46 shaqyrymy jańǵyrtyldy, bul Almaty turǵyndarynyń 99,3%-yn ortalyqtandyrylǵan sýmen qamtamasyz etýge múmkindik berdi. Alataý, Bostandyq jáne Naýryzbaı aýdandarynyń turǵyndaryn sýmen qamtý máselesin sheshý úshin 4 sý jınaǵysh qurylysy men jobasy júrgizilýde. Bıyl 142 shaqyrym ınjenerlik kommýnıkasııa salý jáne 48 shaqyrym jelini jóndeý josparlanǵan. Qabyldanǵan sharalar jyl sońyna deıin turǵyndardyń 99,6%-yn ortalyq sýmen qamtýǵa jáne jelilerdiń tozý deńgeıin 53,8%-ǵa deıin tómendetýge múmkindik beredi.
Úkimet basshysy halyqtyń aýyzsýǵa qol jetkizýiniń mańyzdylyǵyn atap ótip, ınjenerlik ınfraqurylymdy odan ári jańǵyrtý jóninde birqatar tapsyrma berdi.
Sondaı-aq Premer-mınıstr ındýstrııalyq aımaq aýmaǵyndaǵy birqatar kásiporynǵa baryp, ol jerdegi ınvestısııa tartý jáne óndiristi lokalızasııalaý qarqynymen tanysty. Munda jasalǵan jaǵdaı bıznestiń jumysyn jeńildetýge baǵyttalǵan.
Úkimet basshysy «Irrıgator Qazaqstan» zaýytynda ónimdilikti kóbeıtip, sý únemdeýdi arttyrý maqsatynda aýyl sharýashylyǵy daqyldaryn tamshylatyp sýarýǵa arnalǵan, Izraıl tehnologııasy boıynsha jasalatyn tútiksheler óndirý úderisin qarap shyqty. Bıyl qańtar aıynda iske qosylǵan kásiporyn jylyna baý-baqsha, jıdek, kókónis jáne dándi daqyldardy sýarýǵa arnalǵan 270 mln metr ónim shyǵarýǵa qabiletti. Kompanııa dırektory Murat Aqshalov jobaǵa ızraıldik METZERPLAS kompanııasynan 770 mln teńgeden astam sheteldik ınvestısııa tartylǵanyn, bul jobanyń jalpy somasynyń úshten birin quraıtynyn aıtty.
Oljas Bektenov jobanyń sý únemdeýge baǵyttalǵanyn eskere otyryp, onyń mańyzyn atap ótip, memlekettik organdarǵa kásiporyndy tolyq qýatyna shyǵarý máselesin pysyqtaýdy, sondaı-aq aýyl sharýashylyǵy kásiporyndarymen ónimdi satý jóninde ózara is-qımyl jasaýǵa járdemdesýdi tapsyrdy. Aıta keteıik, búginde Qazaqstanda tamshylatyp sýarý naryǵy 70 myń ga quraıdy.
Oljas Bektenov Hyundai Trans Kazakhstan kásipornyna barǵan kezde lokalızasııalaýdy tereńdetý jáne óndiristiń neǵurlym kúrdeli tehnologııalyq úderisine kóshý josparymen tanysty. Premer-mınıstrge zaýyt alańyn 40 myń sharshy metrge, jumys oryndarynyń sanyn 1 700-ge deıin ulǵaıta otyryp, kásiporyndy keńeıtý jáne jańǵyrtý jumysy jóninde baıandaldy. Quny 16,4 mlrd teńge bolatyn zaýytty keńeıtý jobasy tolyǵymen ınvestor esebinen iske asyrylǵan. Sonymen qatar kásiporyn shaǵyn torapty óndiris qýatyn ulǵaıtý jáne jańa modelderdi dánekerleý, boıaý úshin óndiristiń tolyq sıkline kóshý maqsatynda dánekerleý, boıaý jáne qurastyrý sehtaryn jańǵyrtýǵa ınvestısııa salady.
Sondaı-aq Astana Motors kompanııasynyń negizin qalaǵan Nurlan Smaǵulov jumys istep turǵan Hyundai Trans Kazakhstan zaýytynan basqa jylyna 90 myń jeńil avtomobıl shyǵara alatyn mýltıbrend zaýyty (2025 jyly iske qosý josparlanǵan), avtokólikke arnalǵan qosalqy bólshekter shyǵaratyn úsh zaýyt jáne logıstıkalyq hab kiretin óndiristik klasterdi damytý josparlary týraly habarlady. Jumys ornynyń jalpy sany 6 myń adamnan asady.
Premer-mınıstr Úkimet otandyq avtoónerkásipti qoldaý sharalaryn odan ári jalǵastyratynyn basa aıtty. О́z kezeginde bıznes udaıy damyp, lokalızasııany arttyrýy kerek.
Kelesi nysanda Premer-mınıstrge aýdany 100 myń sharshy metrden asatyn Wildberries jańa logıstıkalyq taratý ortalyǵynyń qurylysy týraly baıandaldy. Bul bizdiń elimizde júzege asyrylyp jatqan osyndaı eki jobanyń biri: ekinshi ortalyq Astanada salynady. Qazirgi kezeńde jobaǵa 12,9 mlrd teńge ınvestısııa quıylǵan. Qurylys jumystaryn 2025 jyldyń II toqsanynda aıaqtaý josparlanǵan. 4 myń jumys ornyn qurý kózdelgen. Almatyda logıstıkalyq taratý ortalyǵyn iske qosý kásipkerlerdiń logıstıkaǵa shyǵyndaryn qysqartýǵa, taýar assortımentin keńeıtýge jáne satýdy ulǵaıtýǵa múmkindik beredi. Bul Wildberries-diń Reseı Federasııasynan tys jerdegi osyndaı alǵashqy jobasy.
Buǵan qosa, jumys sapary barysynda Úkimet basshysy shaǵyn kásipkerlik sýbektilerin qoldaý maqsatynda arnaıy jumys isteıtin Almaty qalasynyń shaǵyn ónerkásip parkteri baǵdarlamasynyń iske asyrylýymen tanysty. Oljas Bektenov «ALAESTATE» JShS-da boldy. Kommýnıkasııanyń barlyq túrimen qamtamasyz etilgen bul óndiristik ǵımarattar keıinnen satyp alý múmkindigimen jeńildikti shartpen jalǵa berilgen. Mysaly, Qulpynai kondıterlik kompanııasy bastapqyda 2016 jyly 150 sharshy metr alańdy jaldaǵan, búginde jalpy aýdany 2 880 sharshy metr bolatyn 3-sehty iske qosty. Jeńildigi bar jaldaý quny kompanııaǵa 500-den astam adam jumys isteıtin 3 seh pen 17 dúkenge deıin ashyp, ósýge múmkindik berdi. Barlyq sehtyń óndiristik qýaty jylyna 900 tonnadan astam daıyn ónimdi quraıdy.
Úkimet basshysy ekonomıkanyń basym sektorlarynda jobalardy iske asyratyn bıznesti qoldaýdaǵy ákimdiktiń naqty jumysynyń mańyzdylyǵyn atap ótti.
«Prezıdent óziniń Joldaýynda Úkimetke shaǵyn kásipkerlik sýbektilerin irilendirýdi yntalandyrý týraly tapsyrma berdi. Almaty men jalpy el ekonomıkasy úshin bıznesti qoldaý ári iskerlik belsendilikti yntalandyrý quraldaryn jetildirý mańyzdy. Indýstrıaldy aımaqtar, ásirese shaǵyn ónerkásiptik parkter tıimdi mehanızmge aınaldy. Munda kásipkerler óndiristi óristete otyryp, únemdelgen qarajatty aınalymǵa jibere alady. Jumysty jalǵastyryp, tájirıbeni basqa óńirlerge taratý qajet», dep atap ótti O.Bektenov.
Sonymen qatar Úkimet basshysy «Jaıly mektep» ulttyq jobasy aıasynda salynǵan №97 mektep-gımnazııasynda boldy. Ǵımarat burynǵy apatty jaǵdaıdaǵy mekteptiń ornyna turǵyzylǵan. Ulttyq joba aıasynda salynǵan alǵashqy mektep jańa oqý jylynyń basynda paıdalanýǵa berilmek.
Búginde nysan 95%-ǵa daıyn, onda árleý jáne aýmaqty abattandyrý jumystary júrgizilip jatyr. Oljas Bektenov qurylys jumystarynyń sapasyn baqylaýdyń mańyzdy ekenin basa aıtty.
Sondaı-aq Úkimet basshysy Halyqaralyq bilim berý korporasııasyn aralaý barysynda naqty kásiporyndarmen yntymaqtastyq ornatý máselesine basa nazar aýdardy. Jas ǵylymı toptarmen ózara is-qımyl sharalary jáne olardyń eńbekteriniń nátıjelerin qala men el úshin mańyzdy salalarda qoldaný múmkindikteri talqylandy.
Premer-mınıstrge 480 orynǵa arnalǵan jańa zamanaýı QazBSQA mektebiniń iske qosylýy, sondaı-aq 2025 jyly paıdalanýǵa beriletin, 345 tósek-orynǵa arnalǵan jataqhana qurylysynyń jospary (2025 jyldyń sońyna deıin barlyǵy 12 myń tósek-oryn, al 2030 jyldyń sońyna deıin taǵy 20 myń tósek-oryn paıdalanýǵa berý josparlanǵan) týraly baıandaldy.
Sonymen qatar seısmıkalyq jaǵdaılar, qala zertteýleri men dızaın zerthanalary tekserildi. Úkimet basshysy bıznestiń naqty mindetterin sheshýge baǵyttalǵan jáne kommersııalandyrý áleýeti bar qoldanbaly jobalardy qoldaýǵa jáne qarjylandyrýǵa basa kóńil bóle otyryp, Joǵary ǵylymı-tehnıkalyq komıssııanyń jumysyn qaıta formattaý qajettigine nazar aýdardy.
Zertteýler jáne ázirlemelerdi baǵdarlamalyq-nysanaly qarjylandyrý boıynsha 2024–2026 jyldarǵa arnalǵan 181 ǵylymı-tehnıkalyq tapsyrma ázirlendi. Aldaǵy 2 jylda jas ǵalymdarǵa arnalǵan granttarǵa respýblıkalyq bıýdjetten 18 mlrd teńge bólinetin bolady. Sonymen qatar eńbek naryǵynda túlekterdiń básekege qabilettiligin arttyrý maqsatynda kadrlar daıarlaý baǵdarlamalaryn jetildirý boıynsha tapsyrmalar berildi.
