«Aýyl halqynyń ál-aýqatyn jaqsartyp, áleýmettik máselelerin sheshýge baǵyttalǵan joba aıasyndaǵy 2,5%-dyq jeńildetilgen nesıe jumyssyzdyqty azaıtýǵa múmkindik beredi. Baǵdarlamanyń oń nátıjesi kóz aldymyzda. О́tken jyly respýblıkalyq bıýdjetten 3 mlrd teńge qaralyp, 406 jobaǵa nesıe usynyldy. 713 jumys orny ashyldy. Bıyl 4 mlrd 600 mln teńge qarjy bólinip otyr. Osy múmkindikti tıimdi paıdalanyp, aýyl halqynyń tabysyn arttyrýda joǵary kórsetkishterge jetýimiz qajet. Bul rette aýyl ákimderine zor jaýapkershilik júkteledi», dedi Nurlybek Nálibaev.
Eraly Toǵjanov aýyl turǵyndarynyń tabysyn arttyratyn baǵdarlama aıasynda óndirýden bólek, ónimdi ótkizý máselesi sheshiletinin de aıtty. Bul, eń aldymen, azyq-túlik qaýipsizdigin qamtamasyz etýge múmkindik jasaıdy. Ár óńirdiń ereksheligine qaraı óndiristik jobalarǵa basymdyq beriledi.
«Aýyl amanaty» jobasyn iske asyrýda 1 tomat pastasy sehy, 34 jylyjaı ashylyp, 671 asyltuqymdy mal alynǵan. 21 sút jáne et ónimi óndirisi iske qosylyp, 66 aýyl sharýashylyǵy tehnıkasy ákelingen. 14 balyq sharýashylyǵy, 18 qus sharýashylyǵy quryldy. Joba qatysýshylarynyń arasynan 38 adam kondıter jáne nan ónimderin pisirýmen aınalysyp, 3 gıdroponıka, 7 jıhaz, 34 plastıkalyq ónimder men kurylys materıaldary óndirisi, 98 qyzmet kórsetý orny ashylǵan.
Joba ıgiligin kórip otyrǵan 106 eldi mekende 51 aýyl sharýashylyǵy óndiristik kooperatıvi qurylyp, 33 kooperatıv 716 mln teńgege qarjylandyrylypty. Bıyl 575 jobany júzege asyryp, 610 jumys ornyn ashý kózdelip otyr.
Qyzylorda oblysy
