Almaty qalasy, Coffee Book kofehanasynda «Mazmundama» baspasynyń bastamasymen Ularbek Dáleıulynyń «Joshy han kim?», Sáýle Dosjannyń «Jaqsylyq Úshkempirov kim?» jáne Asylan Tilegenniń «Mánshúk Mámetova kim?» kitaptarynyń tanystyrylymy bolyp ótti.
Is-sharany ıgi tilegimen baspa dırektory Shyńǵys Muqan ózi ashty. Ádebı tanymdyq keshke «Dástúrge jol» qoǵamdyq uıymynyń aq ájeleri bastaǵan, jastar men balalar qostaǵan qalyń oqyrman qatysty.
Kezdesý keshinde jınalǵan oqyrman kitap avtorlarymen tildesip, óz qolynan qoltańba alý múmkindigine ıe boldy. Ularbek Dáleıulynyń «Joshy han kim?» kitabynda Shyńǵys qaǵannyń tuńǵysh uly Joshy hannyń batyrlyqqa toly ómir joly sýrettelgen. Jıyrma bes jasynda Toǵaıly jurtyn baǵyndyryp, kózge túsken Joshy bala kúninen-aq sheshimtal zerektigimen kózge túsedi. Kóp ótpeı-aq Shyńǵys qaǵannyń buıryǵymen Deshti-Qypshaq ulysyn basqaryp, ordasyn Ulytaýda tigedi. Kitapta Joshy han bılegen zamandaǵy tarıhı oqıǵalar, qazirgi qazaq eliniń alǵashqy qalyptasý kezeńi sýretteledi. Joshy han ultymyz úshin qasterli hám mańyzdy tulǵa ekeni jınaq arqyly qalyń oqyrmannyń júregine jetedi. Baba muratyn arqalaǵan búgingi jas óskin tarıhyn tereń bilse ǵana amanat júgin tereńirek sezineri aqıqat.
Sáýle Dosjannyń «Jaqsylyq Úshkempirov kim?» kitabynda ulttyq namystyń úlgisine aınalǵan qazaq balýany Jaqsylyq Úshkempirovtiń ómir joly, qyzmeti, ómiriniń sheshýshi sátteri kórinis tapqan. Qazaqstanda kúres sportynyń damýyna zor úles qosqan ataqty sportshynyń jarqyn oqıǵalarǵa toly ómir joly jastarǵa úlgi ekeni daýsyz. Sportshy tek bozkilemde ǵana emes, ómirde de óz ustanymdarynan taımaı, adamshylyqtyń aq týyn kóterip, eline eren eńbek sińirdi. Jınaqta Jaqsylyq Úshkempirov ómiriniń sheshýshi kezeńderi baıandalyp, oqyrmannyń jeńiske umtylýyna shabyt syılaıdy.
Asylan Tilegenniń «Mánshúk Mámetova kim?» kitabynda qazaqtyń batyr qyzy Mánshúk Mámetovanyń balalyq shaǵyna sholý jasalyp, jas kúnindegi ójet bolmysy men qan-qasap maıdan dalasyndaǵy erlikteri baıan etiledi. Kitaptyń mańyzy sol, jınaq ár qazaq balasynyń boıdaǵy jaýapkershilikti seziný, otandy súıý syndy abzal qasıetterin oıatyp, izgiliksúıgishtikke, erjúrektilikke baýlıdy. Kitaptaǵy kesteli órilgen oqıǵalar Mánshúk Mámetovanyń zamandastary, kózkórgenderi, aǵaıyn-týystarynyń esteligi boıynsha shyndyqqa negizdelip jazylǵan.
«Mazmundama» baspasynyń «Tulǵataný» serııasymen osy ýaqytqa deıin adamzat aqyl-oıyna qyzmet etken belgili tulǵalar men otanymyzdyń súbeli qaıratkerleri týraly kóptegen kitap jaryqqa shyqqan bolatyn. Atap aıtar bolsaq, «Ahmet Baıtursynuly kim?», «Nıkola Tesla kim?», «Dına Nurpeıisova kim?», «Dinmuhamed Qonaev kim?» «Sanjar Asfendııarov kim?» syndy jınaqtar oqyrman yqylasyna bólenip úlgerdi. Bul kitaptardyń basty ereksheligi – elimizge belgili tulǵalardyń ómiri men shyǵarmashylyǵyn mektep muǵalimderi men oqýshylardyń tiline laıyqtap, jeńil de beıneli tilmen áserli jetkizýi. Eleýli bastama alda júıeli jalǵasyn taýyp, oqyrmanǵa ózge de tabysty dúnıeler syılaıtynyna senimimiz mol.
