Foto: Densaýlyq saqtaý mınıstrligi
Ortalyq dárigerleri Mınsk respýblıkalyq ǵylymı-tájirıbelik «Ana men bala» ortalyǵy fetaldy medısına bólimshesiniń meńgerýshisimen birge Almaty qalasy, Almaty jáne Aqmola oblystarynan kelgen úsh júkti áıelge ota jasady.
Otany jasaý aıasynda myna jumystar atqaryldy:
- Feto-fetaldy transfýzııa sındromynan (FFTS) asqynatyn kópuryqty júktilik kezindegi balanyń joldasy anastomozynyń lazerli koagýlıasııasy. Bul ádis uryqtar arasyndaǵy tamyrlardyń patologııalyq birigýin joıýǵa áser etip, qatty asqynýdyń aldyn alady jáne egizderdiń ekeýiniń de ómirin saqtaıdy.
- Sharana suıyqtyǵy patologııasy bolǵan jaǵdaıdaǵy amnıoredýksııa jáne amnıoınfýzııa. Bul prosedýralar uryqtyń damýyna qolaıly jaǵdaı týǵyza jáne asqyný qaýpin azaıta otyryp sharana suıyqtyǵy mólsherin retteýge kómektesedi.
- Uryqtyń búırek patologııasy bolǵanda qýyqty drenajdaý. Bul ota uryqtyń nesep aıdaý júıesiniń durys jumys isteýin qamtamasyz etedi jáne onyń durys damý múmkindigin jaqsarta otyryp búırek jetispeýshiligi asqynýynyń aldyn alady.
Densaýlyq saqtaý mınıstrliginiń málimetinshe, barlyq operasııa sátti jasalǵan. Qazir naýqastardyń jaǵdaıy turaqty. Olardyń júktilik kezindegi densaýlyǵyn mamandar udaıy baqylap, uryqtyń odan ári durys damýyn qamtamasyz etedi.
Bul otalar Densaýlyq saqtaý mınıstrliginiń «Fetaldy medısına» jobasynyń aıasynda jasaldy. Endi elimizdegi áıelder álemdik standarttarǵa saı keletin joǵary tehnologııaly kómek alyp, dúnıege deni saý bala ákele alady. Atalǵan joba ozyq medısınalyq tehnologııalarǵa qoljetimdilikti ulǵaıtýǵa jáne Qazaqstandaǵy júkti áıelderdiń bosanar aldyndaǵy kómek deńgeıin jaqsartýǵa baǵyttalǵan.
