Foto: Arman Mýhatov
Mınıstrlik málimetinshe, 2019 jyldan beri 161 medısına mamanyna shabýyl jasalǵan. Keıingi jyldary osyǵan uqsas jaǵdaılar qoǵamnyń qyzý talqysyna túsip, jıi nazarǵa iligip júr.
Máselen, bıyl mamyr aıynda Almatyda jedel járdem feldsherine ony shaqyrǵan adamdar qol kóterip, páterinde qamap tastaǵan. Qaraǵandyda qyzmettik mindetterin oryndaý barysynda jedel járdem qyzmetkerin úshinshi tulǵa aıaýsyz uryp-soqqan. (Joǵarǵy sot osy is boıynsha búgin úkim kesiletinin málimdedi) Temirtaýda da jedel járdem kóliginiń júrgizýshisi taıaq jep, tonalǵan.
Qazirgi tańda osyndaı zańsyz áreketter Qylmystyq kodeks jáne Ákimshilik quqyq buzýshylyq týraly kodeks boıynsha qaralady.
«Bas prokýratýramen birlese Qylmystyq kodekske ózgerister ázirlendi, onda medısına mamandaryna qatysty zorlyq-zombylyq áreketteri úshin qylmystyq jaýapkershilik qarastyrylǵan. Qylmystyq kodekske «Medısına qyzmetkeriniń zańdy qyzmetine kedergi keltirý» jáne «Medısına qyzmetkerine qatysty zorlyq-zombylyq kórsetý» degen jańa baptar engizý usynylyp jatyr. Bul qadamdar medısına qyzmetkerlerin qorǵaýǵa jáne qaýipsiz jumys ornyn qurýǵa baǵyttalǵan», delingen Densaýlyq saqtaý mınıstrligi taratqan habarlamada.
