Foto: Astana qalasynyń ákimdigi
Stýdenttik kampýstyń ashylýyna Ǵylym jáne joǵary bilim mınıstrliginiń, Astana qalasy ákimdiginiń ókilderi, «AMANAT» partııasynyń músheleri jáne elordalyq máslıhat depýtattary qatysqan.
100 jáne 700 oryndyq zamanaýı jataqhanalarda jaıly ómir súrý, oqý jáne demalys úshin barlyq jaǵdaı jasalǵan. «Turan-Astana» ýnıversıtetiniń stýdentterine arnalǵan 100 oryndyq jataqhana Stepan Razın 1-shi tuıyq kóshesi, 26/1 mekenjaıynda ornalasqan, al Astana Medısına ýnıversıtetiniń stýdentterine arnalǵan 700 oryndyq jataqhana Grıgorıı Potanın kóshesi, 9 mekenjaıynda ornalasqan.
«Jataqhana Astana qalasy ákimdiginiń front-ofısiniń qoldaýymen paıdalanýǵa berildi. Bul jataqhanada stýdentterdiń jaılylyǵy úshin bar jaǵdaı jasalǵan. Bólmelerde barlyq qajetti jıhazdar, tońazytqysh jáne joǵary jyldamdyqty ınternet bar. Bizdiń ýnıversıtet stýdentterdiń jataqhanaǵa degen qajettiligin 100% qamtamasyz etti», dedi «Turan-Astana» ýnıversıtetiniń rektory Gúljamal Japarova.
Sondaı-aq is-sharada Qazaqstannyń Halyq Qaharmany, qazaqtyń tuńǵysh ǵaryshkeri, «Turan-Astana» ýnıversıtetiniń professory Toqtar Áýbákirov quttyqtaý sóz sóılegen.
«Bizdiń memleketimiz stýdentter úshin úlken múmkindikter jasaıdy. Stýdentter memlekettiń qamqorlyǵyn baǵalap, ýnıversıtetti bitirgennen keıin Otan úshin qyzmet etsin», dedi Toqtar Áýbákirov.
Esterińizge sala keteıik, 2023 jyly Astanada stýdenttik jataqhanalar salý boıynsha jobalyq keńse (Beıbitshilik kóshesi, 9) ashylǵan. Front-ofıstiń negizgi mindeti – jataqhanalar salý jónindegi memlekettik baǵdarlamany iske asyrý úshin qolaıly jaǵdaılar jasaý jáne stýdentterdi turǵyn úımen qamtamasyz etý, JOO-lar men áleýetti ınvestorlarǵa zańgerlik, konsýltasııalyq jáne saraptamalyq qoldaý kórsetý.
Bıyl Astanada MJÁ aıasynda alty jataqhana salý jáne paıdalanýǵa berý josparlanǵan. Olar 4,5 myńǵa jýyq oryn qurýǵa múmkindik beredi.
