Foto: Sý resýrstary jáne ırrıgasııa mınıstrligi
Otyrys qorytyndysy boıynsha taraptar birlesken 6 sheshimge qol qoıǵan. Atap aıtqanda, Qazaqstannyń 2024-2026 jyldar aralyǵynda tóraǵalyǵy kezinde HAQQ Atqarý komıtetiniń jumys jospary bekitilip, qujat 10 túrli baǵyt boıynsha 40-qa jýyq is-sharany qamtıdy dep josparlanǵan.
Sondaı-aq eki iri óńirlik joba: Aral teńizi basseıni elderine kómek kórsetý jónindegi is-qımyl baǵdarlamasy men Ortalyq Azııadaǵy ornyqty damý úshin qorshaǵan ortany qorǵaý jónindegi óńirlik baǵdarlamany iske asyrý nátıjeleri qaralǵan.
Otyrysqa qatysýshylar HAQQ uıymdyq qurylymy men sharttyq-quqyqtyq bazasyn jetildirý jónindegi jumys tobynyń qyzmetin jeke qarastyrǵan. Taraptar osy aıdyń basynda Astanada ótken jumys tobynyń 12-shi otyrysynyń qorytyndysyn da sóz etti.
Sonymen qatar, Dúnıejúzilik bankpen birlesken Ortalyq Azııa elderiniń gıdrometeorologııalyq qyzmetin jańǵyrtý jobasynyń qorytyndysy shyǵarylǵan. Budan bólek, HAQQ elderi Qazaqstan men Fransııa birlesip ótkizetin «Biryńǵaı sý» sammıtine qatysatyndaryn rastady.
«Qazaqstan HAQQ-qa endi tóraǵalyq ete bastaǵanyna qaramastan, qazirdiń ózinde nátıje kórinip tur. Jaqynda Astanada Qordyń normatıvtik-quqyqtyq bazasy men ınstıtýsıonaldyq qurylymyn jetildirý jónindegi óńirlik jumys tobynyń otyrysy ótti. Barlyq elder jemisti jumys jasady, HAQQ basqarý qurylymy men quqyqtyq bazasyn jetildirý boıynsha óz usynystaryn berdi. Barlyq taraptar is–sharanyń qorytyndysyna rıza», dedi Tájikstannyń Energetıka jáne sý resýrstary mınıstrliginiń Sý-energetıkalyq saıasat, ǵylym men tehnıkany damytý bas basqarmasynyń basshysy Daler Abdýrazokzoda.
