Sýretterdi túsirgen – Erlan OMAR, «EQ»
Qazaq halqynyń mádenıetin álemge áıgilep, ulttyq mýzykamyzdy jańa qyrynan tanytyp júrgen elimizdiń birtýar uly, Qazaqstannyń halyq ártisi, kompozıtor, mýltıaspapshy Dımash Qudaıbergenniń bul kórmesi óner ıesiniń shyǵarmashylyq joly men jetistikterin kórsetetin biregeı mádenı keńistik qurýǵa baǵyttalypty. Erekshe oqıǵadan syrt qalmaı, keremet kórmeniń kýási bolýǵa biz de bardyq.
Ataýynyń ózi alystan atoılap shaqyratyn jarqyn joba ánshi ómirin ár qyrynan áıgileıtin baǵaly eksponattar men mańyzdy málimetterge baı. Atap aıtsaq, «Dúnıe dıdaryndaǵy Dımash» kórmesine qazaq janynyń bolmysyn beıneleıtin, onyń qaıtalanbas únin qalyptastyrǵan, ómirindegi eleýli oqıǵalar týraly habar beretin qundy jádigerler, tanymal tulǵalar men kóptegen jankúıerdiń syılyqtary usynylǵan.
Kórmege qoıylǵan 200-den asa eksponattyń arasynda Dımashtyń sahnalyq kostıýmderi, 2015 jyldan bergi ánshige syılanǵan túrli syılyqtar men qundy jádigerler toptastyrylǵan. «Shabyt kózderi» atalatyn alǵashqy bóliminde ártistiń ómirbaıany, ósken ortasy, balalyq shaǵy men shyǵarmashylyq jolyn kórsetetin zattar qoıylsa, «Dańqqa aparar jol» degen bóliminde Dımashtyń kásibı bilim jolynda alǵan dıplomdary, respýblıkalyq, halyqaralyq baıqaýlarda ıelengen marapattary, t.b dúnıeler kópshilik nazarynan usynyldy. «Jankúıerler mahabbaty» deıtin úshinshi bólmine ánshiniń jankúıerleri tartý etken syılyqtar qoıylsa, al «Ult mádenıetiniń jarshysy» atty tórtinshi toptamaǵa álemdik arenada ulttyq mádenıet pen brendtiń tanylýyna yqpal etetin Dımashtyń zattary – ulttyq mýzykalyq aspaptar, ulttyq kostıýmderi, baspa materıaldary, t.b. qoıylǵan.
Kelýshiler ánshiniń ómir jolyndaǵy ár basqan qadamyna kýá bolyp qana qoımaı, shyǵarmashylyqtaǵy jetken jetistikteri men jarqyn sátteriniń, jankúıerleri syılaǵan baǵaly syılyqtar men mýzykalyq aspaptardy da kórip, kózaıym boldy. Sonyń ishinde, ásirese, Maıkl Djeksonnyń qoltańbasy bar banner, Djekı Channyń syılyqtary kórme qonaqtarynyń kóńiline erekshe áser qaldyrdy.
Kórmeniń taǵy bir qundy murasy hám kelýshilerdiń aıryqsha nazaryn burǵyzǵan dúnıe – Dımashtyń besigi boldy. Japqyshyna:
«Áldıin tyńdap ájeńniń,
Uly bol kúlli álemniń» – degen Mıýa ájeıdiń aq tilegi jazylǵan bul baǵaly jádiger dúnıe dıdaryndaǵy Dımashtyń kúlli dúnıetanymyn tanýǵa múmkindik bergendeı.
Jahan nazaryna usynylǵan erekshe eksponat Dımashtyń atasy marqum Qudaıbergen aqsaqaldyń 1970 jyly uly Qanatqa arnaıy tapsyryspen daıyndatqan múlki eken, ıaǵnı bul besiktiń jasalǵanyna da jarty ǵasyrdan astam ýaqyt ótipti. Bala Qanat uıyqtaǵan besikte keıin nemeresi Dımashty da áldılep ájesi terbetipti. Sondaǵy keıýananyń besik jyryna qosyp aıtqan aq tilegin Alla qabyl etse kerek, búginde Dımash atanyń ǵana balasy emes, kúlli ǵalamǵa ortaq ánshige, álem tanyǵan tulǵaǵa aınaldy.
– «Jaqsy sóz – jarym yrys» dep qazaq tegin aıtpasa kerek. Árbir jaqsy sózdiń, izgi tilektiń astarynda bolashaqqa joldama jatatyndaı. О́zderińiz de bilesizder ǵoı, Dımash – atasy men ájesiniń balasy. Sol kisilerdiń tárbıesin kórip, tálimin aldy. Boıyndaǵy bar jaqsy qasıeti men ulaǵatyn boıyna sińirdi. Sonyń barlyǵy beker bolmasa kerek. Ájesiniń aq tilegine perishte «áýmın!» degen eken. Dımashymyzdyń búgingi jetken bar jetistigi men ataǵynyń arǵy jaǵynda sol kisilerdiń aqedil tilegi men baǵanaly batasy jatyr. Ájesiniń tilegi kóp qoı, biraq besikke tek bir tileýin ǵana jazdyq. Ondaǵy maqsatymyz – ulttyq qundylyqtarymyzdy saqtaý, – degen ánshiniń anasy Svetlana Aıtbaeva besiktiń japqyshyn zaman talabyna saı jańalap qoıǵanymen, bastysy, ájesiniń tileýi qaz-qalpynda jazyldy deıdi.
– Qazirge deıin 22 sábıdi terbegen besik aldaǵy ýaqytta da áli talaı áldıdi terbete beredi dep senemiz. О́ıtkeni bul besikte terbelgen bóbektiń eń kishkentaıy áli bir jasqa tolǵan joq, – dep sózin túıindedi ánshiniń anasy.
Qazaqtyń maqtanyshyna aınalǵan Dımash Qudaıbergenniń shyǵarmashylyǵynan, ómir jolynan syr shertetin erekshe ekspozısııa mýzeıdiń 6-qabatynda ornalasqan kórme zalynda 6 qazanǵa deıin jalǵasady.
