Mundaı synaq túri jyl saıyn elimizdiń ár aımaǵynda ótkiziledi. Negizgi maqsaty – ekstremızm jáne lańkestiktiń jolyn kesý, qoǵam men azamattardyń qaýipsizdigin qamtamasyz etý mindetin oryndaıtyn «B» arnaıy jasaǵy músheleriniń daıyndyǵyn shyńdaý. Jalpy jasaqtar quramynda barlyq talapqa saı keletin sardarlar men kelisimshart boıynsha áskerı qyzmetshiler bar.
Bıylǵy dástúrli dodaǵa 300-ge jýyq nıet bildirýshiniń arasynan iriktelgen 80-nen asa úmitker qorytyndy synaqqa qatysty. Olar alǵashqy kezeńde teorııalyq testileýden ótip, dene shynyqtyrý, bıiktiktegi daıyndyq, arnaıy qurylǵylarmen tómen túsý, baılanys jáne medısınalyq daıyndyq boıynsha synaq tapsyrdy. Osy tapsyrmalardan tómen kórsetkish kórsetken qatysýshylar ekinshi kezeńge óte almady. Sheshýshi kezeńge nebári 44 úmitker jiberildi.
Sheshýshi kezeńniń birinshi kúni synaqqa qatysýshylar tańǵy saǵat 5.00-de dabyl arqyly kóterilip, eń aldymen 5 shaqyrymǵa júgirý boıynsha synaq tapsyrdy. Odan soń uzaq ta kúrdeli joryqqa attandy. Jolda olar qarsylastyń shabýylyn toıtarý, jaralanǵan qarýlasynyń jarasyn tanyp, qaýipsiz aımaqqa súırep ótý, órt shyqqan aımaqtan tynys alýǵa arnalǵan bas kıimmen júgirý sekildi tapsyrmalardy oryndady. Jolaı ábden sharshaǵan jaýyngerler baýyrymen jorǵalap, jatqan kúıi tasalanýǵa arnalǵan or qazdy jáne etigimen sý keshti. Tań atpastan aıaqqa turǵan úmitkerler jele jortqan kúıi keshke deıin damyl tappady.
Synaq kezinde jaýyngerlerge fızıkalyq jáne psıhologııalyq soqqy jasaldy. Olar soǵan qaramastan kezikken qıyndyqtardy jeńip, márege jetý úshin erik-jigerin aıaǵan joq. Osymen bir aptadan beri arnaıy jasaq jaýyngerleri oryndap jatqan tapsyrmalar legi aıaqtalyp, synaqtyń qorytyndy kúni olar 10 shaqyrym júgirip, oq dári salynǵan qobdıshalardy súıreýden normatıv tapsyrdy. Selkildek kópir ústinen ótip, temir baǵannan tómenge syrǵanady.
Qıǵash qoıylǵan aǵashtardyń birinen eńkeıip, birin attap, shynjyr baılanǵan dóńgelekter qabyrǵasyna órmelep shyqty. Aspaly temirlerdi de artta qaldyrdy. Sý basseınine sekirip, bıik tas qabyrǵany birlese eńserdi.
Osy ýaqyt aralyǵynda jan-jaqtaryn órt torlap, aldarynan pýlemet saqyldap turdy. Al ózge de kedergilerdiń mańyna taıaǵan kezde jarylys bolyp jatty. Olar burqyraı atylǵan pýlemet oǵynynyń astynan jorǵalap baryp, qaýipsiz núktede asynyp júrgen qarýymen oq atty. Úmitkerlerge bir oq jáne bir ǵana múmkindik berildi. Qum tıip, sý shashylǵan qarý atpaı qalsa, jaýynger synaqty osy jerde aıaqtar edi. Baby men baǵy qatar shaýyp, aýyr synnan súrinbeı ótkender aqtyq syn – qoıan-qoltyq tóbeleske shyqty. Úsh raýndtan turatyn jekpe-jektiń sońǵy bóliminde rıngtegi jigitter tyń turǵan kúreń beret ıegerlerimen kúsh synasty. Abyroı bolǵanda, buǵan deıin sapta bolǵan 15 úmitkerdiń bári de 9 mınýt boıy soqqylarǵa tótep berdi. Áli ketip, kúshi sarqylǵandardyń ózi temirdeı tózimdilik tanytty.
Synaqtan súrinbeı ótkenderge saltanatty jaǵdaıda qasterli kúreń beret tabystaldy. Is-sharaǵa Jambyl oblysynyń ákimi Erbol Qarashókeev arnaıy keldi. Qurmetti qonaqtardyń arasynda Ulttyq ulan áskerimen tyǵyz baılanystaǵy ózge de áskerı kúsh qurylymdarynyń basshylary boldy.
– «Kúreń beret» bas kıimin kııý ári «Búrkit» keýde belgisin taǵý quqyǵyna ıe bolý janqııarlyq erlik pen batyldyqty talap etedi. Dese de mundaı synaqqa quryshtaı shynyqqan jaýyngerler ǵana baratyny anyq. Kúreń beretti kııý mártebesine arnalǵan biliktilik synaǵynan ótý – jaýyngerlik rýhtyń belgisi. Bul is-shara jastardy Otanǵa degen adaldyq pen rııasyz mahabbatqa tárbıeleýge baǵyttalǵan, – dedi oblys ákimi.
Odan keıin Ulttyq ulan bas qolbasshysynyń orynbasary, general-maıor Baýyrjan Ábjanov synaqtan súrinbeı ótken saıypqyrandarǵa «Kúreń beret» bas kıimin tabystady.
– Bul synaqtar quqyqtyq tártip áskeriniń dástúrli sabaqtastyǵyn jalǵaı otyryp, «Búrkit» arnaıy jasaq jaýyngerleriniń kásibı biliktiligin arttyrý, sheberlikterin shyńdaý maqsatynda uıymdastyryldy. «Búrkit» arnaıy jasaǵynyń jaýyngerleri ózderine júktelgen tapsyrmalardy sátti oryndap keledi. Sondaı-aq memlekettiń jáne azamattardyń konstıtýsııalyq quqyǵyn qorǵaýda óz mindetterin abyroımen atqaryp júr. Bıyl jeltoqsan aıynda arnaıy jasaqtyń qurylǵanyna 25 jyl tolady. Osy ýaqyt aralyǵynda IIM jáne Ulttyq ulan basshylyǵy arnaıy jasaq jaýyngerleriniń daıyndyǵyna qoldaý kórsetip, nazarda ustap keldi. Qazirgi ýaqytta arnaıy jasaq bólimshelerin qamtamasyz etý deńgeıi artpasa, kemigen emes. Sondyqtan da munda qyzmet atqarǵysy keletin áskerılerge qoıylatyn talap qatań. Bul sózimizge «Kúreń beret» baýyrlastyǵyna qosylǵan jaýyngerlerdiń deńgeıi dálel bola alady. Búgin kúreń beret kıgen áskerı qyzmetshilerdiń qatary 15 adamǵa tolyǵyp otyr, – dedi B.Ábjanov.
Synnan sátti ótken jaýyngerlerdiń tókken teri, etken eńbegi aqtaldy. Olar bul kúndi eshqashan umytpaq emes.
– «Kúreń beret» alý – meniń armanym edi. Osy synaqqa tyńǵylyqty daıyndaldym. Maǵan senim artqan adamdarǵa aıtar alǵysym sheksiz. 65 shaqyrymdy eńserdik. Bul tyńǵylyqty daıyndyqtyń ǵana emes, namys pen jigerdiń de arqasynda dep oılaımyn. Jasym 41-ge taıap qaldy. Búginge deıin osy qurmetke ıe bolýdy maqsat etip edim. Byltyr dál osy synaqtyń jartysyna kelgende densaýlyǵym syr berip, qalyp qoıdym. Shúkir, jaqyndarymnyń arqasynda eńsemdi tiktep, búgingi deńgeıge jettik. Bul men úshin Olımpıada altynymen parapar, – dedi «JAK» esimdi jaýynger.
Aıta keteıik, áskerı qyzmetshiler arasyndaǵy qaısarlyq pen ójettikti, shydamdylyq pen tózimdilikti syńǵa salar aıtýly is-sharany tamashalaýǵa Túrkııa, Reseı, О́zbekstan, Qyrǵyz Respýblıkalarynyń arnaıy jasaq ókilderi de kelip, ózderiniń joǵary baǵasyn berdi.
