36 jastaǵy Belal Muhammad AQSh-tyń Chıkago qalasynda týyp-óskenimen, onyń shyqqan tegi – palestınalyq. Kezinde bolashaq chempıonnyń ata-anasy surapyl soǵystan qashyp, Iordan ózeniniń jaǵalaýynan Amerıkaǵa kelip bas saýǵalady. Bala kezinen sportqa qumar bolǵan Belal boks, kúrespen aınalysyp, brazılııalyq djıý-djıtsýdan qara belbeý ıegeri atandy. 24 jasqa tolǵan shaǵynda aralas jekpe-jekke myqtap den qoıdy. 2012 jyldyń jazynda tusaýkeser kezdesýin Indıana shtatyndaǵy Valpareızo qalasynda jerilikti sportshy Djastın Brokqa qarsy ótkizip, ony birinshi raýndta-aq uryp jyqty.
2016 jyl Muhammadqa sátsiz boldy. Alǵashqy tórt jyl aralyǵynda toǵyz jekpe-jek ótkizip, barlyǵynda jeńiske jetken ol atalǵan maýsymda qatarynan eki ret jeńilistiń kermek dámin tatty. UFC-degi tusaýkeser básekesinde Alan Djýbannan upaı sanymen utylsa, kóp keshikpeı Vısente Lýkeniń qarqyndy shabýylyna shydaı almady. Biraq bul sátsizdikter palestınalyq oǵylannyń saǵyn syndyra alǵan joq. Odan keıingi eki jylda keıipkerimiz Rendı Braýn, Djordan Maın, Tım Mıns, Shans Renkýntrege san soqtyrdy.
Sońǵy ret Belal 2019 jyldyń 19 qańtarynda jeńildi. Nıý-Iorkte uıymdastyrylǵan jarysta ol Nıl Djeffke upaı sanymen ese jiberdi. Sodan bergi bes jarym jyldan asa ýaqyt aralyǵynda Chıkago týmasynyń tegeýrine eshkim tótep bere almady. Palestınalyq faıter Kertıs Mıllender, Takashı Sato, Laıman Gýd, Dıego Lıma, Demııan Maııa, Stıven Tompson, Vısente Lýke, Shon Bredı, Gılbert Bernsten basym tústi. 2021 jylǵy 13 naýryzda Muhammad Leon Edvarspen kúsh synasty. Báseke qyzǵan tusta Leon Belaldyń kózin shuqyp aldy. Sonyń saldarynan ol kezdesýdi jalǵastyra almady. Aqyry bul jekpe-jek esepke alynbady.
Bıyl 27 shildede Belal Leon Edvarspen qaıta jolyqty. Ulybrıtanııada turyp jatqan Iаmaıkanyń týmasy osydan eki jyl buryn nıgerııalyq Kamarý Ýsmandy «hed-kık» ádisimen uryp jyǵyp, UFC chempıony atanǵan edi. Odan keıin ol altyn belbeýin eki márte sátti qorǵady. Aldymen qaıta Kamarýdy qapy qaldyrsa, ile-shala Kolbı Kovıngtannyń osal tusyn tapty. Anglııanyń Manchester qalasynda ótken aıqas Muhammadtyń paıdasyna sheshildi. Amerıkadan kelgen jigit barlyq komponentterde jergilikti faıterden basym tústi. Báseke aıaqtalǵannan soń tóreshiler biraýyzdan jeńisti soǵan berdi. Sóıtip, Belal Muhammad álemdegi eń beldi promoýshenniń jartylaı orta salmaqtaǵy chempıony atandy. Ol oktagonda barlyǵy 28 kezdesý ótkizip, 24 ret jeńis toıyn toılady. Alty aıqasty merziminen buryn aıaqtady.
– UFC chempıony bolǵan rahat eken. Men qazir alyp taýdyń eń bıik shyńynda turǵandaımyn. О́zge sportshylar tómende turyp, maǵan qyzyǵa da, qyzǵana qaraıtyndaı. Olardyń deni meniń altyn belbeýimdi tartyp alýdy armandaıdy. Únemi jekpe-jekke shaqyryp álek. Al tańdaý – mende. Kimdi qalasam, sonymen judyryqtasamyn. Qazir kópshilik meniń Kamarý Ýsman nemese Shavqat Rahmonovpen kúsh synasqanymdy qalaıdy. Kamarýmen maǵan qyzyq emes. Ony buǵan deıin eki ret uttym. Onyń ústine ol qatarynan úsh márte jeńildi. Shyny kerek, Ýsman qartaıyp qaldy. Sondyqtan da men Shavqatty tańdaımyn. Birinshiden – ol jas, ekinshiden – áli de jeńilistiń kermek dámin tatqan emes. Eger qazaqty utsam, UFC-degi bedelim odan ári arta túsetini anyq. Sonda meniń naǵyz chempıon ekenime eshkimniń kúmáni bolmaıdy. Sol sebepti de dáp qazir Rahmonovpen aıqasýǵa nıettimin, – deıdi Muhammad Belal.
Al Shavqat Rahmonovtyń júrip ótken joly barsha qazaq jankúıerleriniń kóz aldynda. Kelesi aıda orda buzar 30 jasqa tolǵaly otyrǵan qandasymyz sporttyń bul túrin serik etkeli 10 jyl boldy. Sol aralyqta 18 ret oktagonǵa shyǵyp, barlyq básekede aıqyn basymdyq tanytty. «Nomadqa» qarsy shyqqan jigitterdiń birde-bireýi aıqastyń sońyna deıin shydamady. Rahmonov 2020 jyldan beri UFC-de óner kórsetedi. Sol tórt jyl aralyǵynda qazaqtyń qaısar uly brazılııalyq Aleks Olıvera («qylǵyndyrý») men Mıshel Prazeıres («qylǵyndyrý»), gaıanalyq Karlston Harrıs (aıaqpen teýip qulatty), amerıkalyq Nıl Megnı («qylǵyndyrý»), Djef Nıl («qylǵyndyrý»), Stıvpen Tompson («qylǵyndyrý») syndy sańlaqtardyń tas-talqanyn shyǵardy. Osy derekterdiń ózi-aq Shavqattyń chempıondyq tájge talasýǵa laıyq ekenin aıǵaqtap tur.
