Foto: Aqorda
«Máslıhattar – jergilikti ózin-ózi basqarý júıesindegi negizgi ınstıtýt. Sondyqtan onyń tıimdiligi depýtattardyń kásibıligine tikeleı baılanysty. Bilimine biligi saı depýtattar korpýsyn jasaqtaýǵa, eń aldymen, olardy usynǵan partııalar múddeli bolýy kerek. Búgin máslıhat depýtattarynyń biliktiligin jetildirý týraly usynys aıtyldy. Máslıhat depýtattary qyzmetiniń tıimdiligin arttyrý úshin bul baǵytqa erekshe nazar aýdarý qajet. Buǵan Memlekettik basqarý akademııasyn tartý kerek. Partııalar óz depýtattarynyń biliktiligin jetildirý maqsatynda Akademııamen yntymaqtastyq ornatqany jón dep sanaımyn. Árıne, bul jumysty aımaqtyń erekshelikterin, halyq qalaýlylarynyń kásibı jáne qoǵamdyq-saıası tájirıbesin eskere otyryp uıymdastyrý qajet» dedi Prezıdent.
Memleket basshysynyń aıtýynsha depýtattar halyqpen tikeleı baılanys jasaı bilýge tıis.
«Sonymen birge depýtattar halyqpen tikeleı baılanys jasaı bilýge jáne óz jumysy týraly qoǵamdy jan-jaqty habardar etýge tıis. Moıyndaýymyz kerek, bul iste kózge kórinip turǵan kemshilikter bar. Atap aıtqanda, máslıhat depýtattarynyń saılaýshylar aldyndaǵy esebi kóbine formaldi túrde ótedi. Mundaı kezdesýlerge tyńǵylyqty daıyndalyp, sapaly ótkizýge erekshe mán bergen durys. Saıasat daǵdylaryn meńgerý, adamdarmen sóılese alý jáne ashyq dıalog kezinde óz ustanymyn dáleldeı bilý óte mańyzdy» dedi Prezıdent.
Prezıdent máslıhat depýtattaryna Májilisten úlgi alý kerektigin aıtty.
«Osylaısha máslıhattar jarııa saıasatkerlerdiń jańa tolqynyn qalyptastyratyn orynǵa aınalady. Sonymen qatar máslıhat depýtattary azamattar kóteretin máselelerdi baqylaýda ustaýy qajet. Jergilikti atqarýshy organdarǵa yqpal etý úshin óz ókilettikterin barynsha paıdalanýǵa tıis. Únemi syndarly pikirtalastar ótip, naqty sheshimder ázirlenetin Májilisten úlgi alý kerek», dedi Memleket basshysy.
